In Memoriam di Ronny Koolman 

Cu hopi tristesa partido MEP a ricibi e noticia cu un gran Arubiano, baluarte y co-fundador di MEP, sr. Gregorio ‘Ronny’ Koolman a fayece siman pasa. Ronny Koolman a nace riba 9 di mei 1940 y a fayece riba 11 di juni 2015. Ronny a gradua como maestro di school na aña 1963 y a traha na diferente school: Antoniusschool, Pius X school, Tarcisiuscollege y La Salle College. Tambe e tabata envolvi cu Avond MAVO Progreso di cual e tabata co-fundador y despues a bira director. Na 1968 Ronny a obtene su diploma di L.O. Spaans.

Despues di fundacion di MEP na februari 1971, na dos ocasion (1975 y 1979) Ronny a aparece riba lista di partido MEP. Asina el’a wordo eligi na 1979 como miembro di Staten di Antiyas. Durante su trayectoria den politica, Ronny Koolman a lucha schouder cu schouder hunto cu Betico Croes pa cu e logro di Status Aparte pa Aruba. 

Dia 4 di mei 1981 Ronny a asumi e encargo como hefe di Onderwijszaken di Teritorio Insular di Aruba y den e funcion aki el’a haci un bunita trabao. Pa tur loke cu el a haci pa comunidad, Ronny a ricibi e condecoracion Real di Ridder in de Orde van Oranje Nassau.

Sin duda cu Ronny semper a keda yuda su partido stima MEP y asina tres aña pasa, durante Congreso 2012 di MEP “Hunto padilanti”, el’a tene un discurso sumamente elocuente den cual el’a trece padilanti tur su preocupacionnan pa loke ta e relacion di Aruba den Reino Hulandes y tambe varios tabata su sugerencianan concreto pa yuda fortifica posicion di MEP.

Partido MEP ta gradici Ronny Koolman pa tur loke el a haci pa nos pais y pa MEP y ta spera cu e lo tin un bunita lugar den Reino Celestial. Tambe na su señora, yiunan y demas famia ta bay nos mas sincero condolencia. Cu Ronny sosega na paz den brasa di Señor.

Expresionnan haci den e articulo aki no necesariamente ta refleha opinion di ArenaPoliti.co