Ironico si ta e hecho cu e mesun Minister en cuestion cu a sali declara cu "cifranan bunita"  cu partido MEP lo ta hasiendo atentado contra turismo ta e persona cu pa simannan largo a forma parti di manifestacionnan cu si a causa un desorden publico, chaos den trafico y tambe a atacha nos imagen pe turista. Hasta e manifestacionan aki a tuma lugar na airport creando un chaos y dunando un promer mal impreshon na e turista dibiaha cu e la sali for di airport. Lamentabel ta cu  turistanan no tawatin acceso pa medio di transporte y no a kedanan nada otro cu lastranan maletanan.

 

Enbes gobierno a enfoka riba e calidad di turista tur dia nos por a wak un grupo grandi ta sali cu nan rugtas for di airport crusa caminda pa tuma transporte publico. Ta asina aki Gobierno di AVP ta hustifica y defende crecemento? Nos ta puntra nos mes ta cu ki cara kier gaba y pronkia cu un crecemento leve siendo cu esaki ni ta e nivel cu partido MEP a lage promer cu crisis mundial. Ademas si nos turismo ta bayendo asina bon lo nos a spera cu nos pais lo a sali # 1 den caribe! Banda di esaki si e crecemento tawata asina significante lo esaki lo a wanta sla pa nos y lo por a compensa di berdad e dilema financiero crea door di AVP mes cu nos pais ta aden. Den e rapport di CFT ta wordo menciona cu e crecemento no ta uno cubo depende di dje si presenta cualkier tipo di crisis. E hecho cu nos pais financieramente ta un desaster y riba dje nos economia ta uno fragil ta mustra cu e crecemento di turismo mester ta uno di escala grandi promer cu Minister Oduber tin pensa di para gaba cu algo asina. Tambe CFT a señala cu no tawatin cambio den mercado y cu te dia di awe nos a keda depende di e mercado noord america. Dus esaki ta bisabo cu Otmar Oduber nunca a hasi lo suficente pa demostra un crecemento di escala grandi y cu lo por fortifica nos status financiero. 

 

Remarcabel ta si e hecho cu Gobierno di AvP a implemente un cantidad di medida riba e turista cu si ta contribui cu economia di Aruba. E medidanan cu nan a implementa ta entre otro ; aumento di roomtax, aumento di airporttax y como si fuera ta poco a aumenta huurmento di auto door di impone un supuesto tax pa medio ambiente (milieuheffing). Concientemente a scoge pa impone mas belasting riba esnan cu ya caba ta pagando hopi placa pa bin Aruba. Awor esaki no ta perhudica nos turismo? Ta netamente Minister Oduber ta esun cu enbes di laga nos turismo a crece  cual nos pais tin hopi potencial ta esun cu a "brake" nos progreso. Pesei e ta poco incomprendibel con e Minister kier pretende di ta un heroe siendo e ta co-culpabel pa frena e desaroyo di nos pais.