Den Gabinete Eman e contradiccionan ydeclaracionnan hasi ta ponebo duda di e seriedad di parti cierto ministernan y cuestiona y desenmascara e engañonan camufla. Nos a comprende for di declaracionan hasi door di Minister di finanzas actual cu e gelijkbedrag cual su costo ta alrededor di 12 miyon florin nunca a wordo presupuesta pa 2014.

Contradiccion kitamento gelijkbedrag

Sorpresivamente siman pasa promer minister ta sali declara cu lo mester bai aloca fondonan pa gelijkbedrag awor. Según e mandatario esaki a wordo determina door di un protocol cu a wordo firma  cu diferente sindicatonan. Algo cu si ta poco stranjo ta cu sindicalistanan mes a bisa cu na ningún momento e kitamento di gelijkbedrag no tawata forma parti di e contenido. Claramente esakinan ta diferente versionnan cu ta contradeci otro total dunando e impreshon cu loke wordo papia den e dialogo social no ta tur ora ta confiabel. Ironico ta cu promer minister kiermeen cu e por aloca fondonan cu no a wordo inverti e aña aki door di onderbesteding siendo cu cifranan realisa te cu awor ta mustra cu en comparación cu 2013 a a surpasa e nivel di realización di gastonan. Ademas di no tin placa promer minister ta duna e impreshon cu e por desvia di e presupuesto manera cu e ta haya ta bon siendo cu tin proceduranan pa cumpli cune.

Exclui “gelijkbedrag”pa pensionadonan

Cu promer minister ta papia di alocamento di fondonan di otro ministerio ta dudoso pa diferente motibonan. Na promer lugar e presupuesto modifica (traha di nobo y no supletorio) a wordo entrega 30 september door di minister di finanzas y claramente nos por comprende cu den e versión aki di e presupuesto tampoco e “gelijk bedrag” ta wordo inclui of ta bini padilanti. Na di dos lugar nunca Gabinete Eman por a demostra di keda den margen di su mesun presupuesto. E solo hecho cu no a logra ni keda den nan propio balanced budget akkoord crea door di nan mes ta papia un idioma bastante cla. Loke tambe mester tene cuenta cune ta cu mester tin e presupuesto original aproba promer y si acaso ta premira cu lo bai surpasa cierto gastonan lo mester cana e procedura stipula door di ley di comptabilidad pa asina después esakinan por wordo considera legitimo y pa despues bai den un presupuesto supletorio. Realidad ta cu falta 2 luna pa aña caba y loke a wordo cambia den e presupuesto ta exactamente loke CFT a señala cu a bai totalmente robes cual consecuentemente a resulta di bira un modificacion di 209 miyon den presupuesto 2014. Bo por conclui cu nunca Gabinete Eman tawata tin e intención real di paga e “gelijkbedrag” na e pensionadonan. Ta obvio cu e minister di finanzas anterior cu consentimento di promer minister deliberadamente a excluí esaki for di e presupuesto. Pesei nos di oposición ta lamenta e falta di honestidad  y ta haya hopi ironico pa tende promer minister declara “cu mester aloca fondo awor” pretendiendo di hunga un héroe siendo cu e mes tawata tras di e decisión desde un promer principio pa kita placa for di pensionadonan!

Expresionnan haci den e articulo aki no necesariamente ta refleha opinion di ArenaPoliti.co