Fraccion di MEP den Parlamento a emiti e sigiente comunicado. Nos a tuma nota via website di Noticia Cla cu Raad van Advies lo a duna conseho negativo riba e legalidad di e KB, nos mes no a mira e documento ainda, contrario na lider di fraccion di AVP cu a referi na dje awe caba den prensa. Nos a compronde cu e discusion ta si Hulanda a aplica un ley of articulo corecto. Cualquier cu ta e caso, cu por cierto mi ta supone cu awor ta wordo discuti entre RvA y Gabinete di Gobernador, no ta kita nada na e legalidad di di e investigacion di CFT, pasobra e palabracionnan tocante CFT tabata hasi caba desde prome cu e Kb a wordo firma. Ta trata di e palabracionnan hasi entre premier Eman y premier Rutte mas trempan e anja aki.

Pues nos por scohe pa bai den discusion si e KB ta basa riba e ley corecto si of no, of nos por scohe pa sinja acepta e resultadonan di CFT y biba cu e hecho cu e gobierno di Mike Eman a desgracia nos pais, redoblando e debe nacional den 5 anja. Algo cu segun expertonan lo tarda 26 anja pa nos por recupera di dje.

MEP ta di opinion cu mester bin claridad riba e base legal di e KB, pero cu awor ta mas importante pa enfoca riba e situacion financiero y cu te dia di awe Gobierno di Mike Eman ainda no a demostra cu ta tuma esaki na serio, pasobra ni e cambionan di presupuesto 2014 a yega Parlamento, ni e presupuesto 2015 tampoco.

Mi ta contento si cu sr Baba Herde diripiente ta duna balor atrobe na consehonan di Raad van Advies, pasobra ultimadamente nan a bari mayoria tur advies di Raad van Advies for di mesa. Por ehempel e prome paso cu a hinca nos den rumbo pa bancarota financiero: e rebaho di BBO na fin di 2009. Raad van Advies a bisa pa NO bah’e, pero sr. Herde no a worry cu esey. E presupuestonan den ultimo anja, tur Raad van Advies, cu su rason, a bisa cu tabata irealistico, pero toch sr. Herde a bari nan for di mesa. Aactualmente nos tin un ley pa trata privatisacion di seguridad di aviacion, y Raad van Advies a duna 24 motibo pa NO entrega e ley na Parlamento, Minister Otmar Oduber a entrege toch. Ban wak si sr. Herde ta duna Raad van Advies e mesun balor, of si e ta bolbe lubida su palabranan di awe, y bari e conseho di Raad van Advies for di mesa tambe.

Pa e gran mayoria di nos pueblo Gobernador ta wordo considera un heroe pa su decision na fin di juni pa no firma e presupuesto, pasobra ta danki na esey awe nos conose e situacion real di e finansas desastroso di nos pais. Si no tabata pa esey, awe nos tur lo ta bou di manipulacion ainda di Mike Eman cu tin 5 anja ta bisa cu tur cos ta bon, pero awe nos por mira e realidad: un desastre financiero.

 

Evelyn Wever-Croes

23 oktober 2014