Nos a wordo aserca door di diferente studiante di Colegio San Antonio pa e hecho cu nan no ta hayando e atencion necesario di parti Gobierno pa loke ta trata e condicionnan deplorabel di e facilidadnan di dicho scol. Actualmente e studiantenan ta hayando les den trailernan aloca na Centro di bario pero esakinan no ta den bon estado. Nos a constata cu e bentananan ta kibra y airconan no ta trahando, bañonan kibra y tentnan cu ta wordo usa pa pauze a wordo kita y pa corona e obra no tin un gymzaal.

Ironia ta cu awe cu e green conference a inicia e ta reflehando kiko ta e prioridadnan real di parti gobierno. Ta di lamenta cu cosnan cu no ta trece beneficio real pa e pueblo ta haya preferencia riba e hecho cu jiu di cuidadanonan ta bayendo scol den situacionnan deplorabel

Den cuadro di esaki mi kier pa tur studiante na Aruba para pa boso derechonan. Nos ta bringa pa por laga un mihor Aruba pa bosonan. Segun fuentenan nos a tende caba cu studiantenan kier a protesta caba y nos ta spera cu nan por laga nan bos resona pa manda un señal cla na gobernantenan cu educacion ta prioridad y no mester wordo neglisha! E mentalidad cu jui di shon ta mas importante cu jiu di pueblo a muri ora nos pais Aruba a logra su Status Aparte! Nos ta bai sigura cu tur juinan di nos Pueblo tin igual derecho pa un bon Enseñansa y un Bon futuro.

Expresionnan haci den e articulo aki no necesariamente ta refleha opinion di ArenaPoliti.co