Diaranson Lee Tofanelli y Aruba Music Festival a perde e caso den corte contra Pais Aruba unda tabata demanda pa haya riba 6 miyon Florin unda cu huez a mustra cu e decision pa cancela e festivalnan tabata na su lugar mirando e cantidad di iregularidadnan cu a tuma lugar.
E demanda miyonario cu tabatin contra Pais Aruba tabata debi na un acuerdo firma dor di ex minister di MEP Eddie Briesen cu Lee Tofanelli a pesar di consehonan contra esaki proveniente di ATA y tambe CAD y cual a wordo firma na bispo di eleccion y ta wordo cataloga hasta como afscheidbeleid. Den e cuadro aki Gobierno di Aruba a tuma e decision di lanta un caso contra Edison Briesen pa pone personalmente responsabel den caso cu Pais Aruba perde e caso.
Varios biaha por a scucha Sr. Briesen defende interesnan di Lee Tofanelli y a bay asina leu di declara contra Pais Aruba y defende interesnan particular di un extranhero.
E ex minister en cuestion a para fuerte na fabor di Tofanelli, na kende gobierno tabata paga casi 1 miyon Dollar pa aña pa promove nos turismo, pero manera directiva di ATA mes a bisa, e inversion aki tabata demasiado halto y no hustificabel mirando cu e suma inverti tabata demasiado halto pa e cantidad di bishitante of aumento di bishitante relaciona cu e festival.
Esaki sin menciona mes cu e diferente artistanan cu a wordo treci pa e festivalnan aki tabata artistanan cu na algun momento tabata grandi, pero cu no ta atrae publico grandi mas. A pesar di e calidad di artistanan, toch asina a sigui cu e festival aki, a sabiendas cu resultado di esaki ta solamente positivo pa e organizadornan y no ta yuda nos isla na nada.
Por bisa awor cu e decision di corte a cay, unda cu huez a rechaza e demanda di Lee Tofanelli cu Eddie Briesen a pasa dor di wowo di hangua, el a scapa di lo mester a para responsabel pa e suma miyonario cu e mes tabata kier pa Pais Aruba paga Tofanelli.
Palabranan di huez ta “Omdat de vordering in de hoofdzaak niet toegewezen wordt, moet de vordering in de zaak in vrijwaring worden afgewezen”, cu otro palabra, dor cu Lee Tofanelli a perde caso, e ora ta rechaza e demanda den caso di responsabilidad di Eddison Briesen.

Klik aki pa lesa/download e veredicto.

Expresionnan haci den e articulo aki no necesariamente ta refleha opinion di ArenaPoliti.co