ORANJESTAD --  E proyecto di Green Corridor ta den hopi publicidad ultimadamente, debi na un carta cu Minister Sievinger a manda pa Parlamento, den cual e ta informa Parlamento cu e autorisacion cu Parlamento a dune na 2011 pa un maximo di Afl 292 miyon, no ta cubri tur e gasto y e cu e gastonan total lo sali mas. Cuanto mas, e no por bisa.
Locual a hala mas atencion di fraccion di MEP ta e hecho cu e minister mes ta admiti cu eigenlijk e mester a cambia e ley di 2011, pero no tin tempo pasobra e ta pura pa firma, y pesey a scohe pa no manda un cambio di ley parlamento, pero djis un carta pa informa Parlamento.
Pesey Fraccion di MEP a pidi un reunion publico pa discuti esaki, y e reunion aki ta tuma lugar dialuna 2 or di merdia.
Tambe e Fraccion geel a pidi pa Raad van Advies duna un conseho si e interpretacion cu Minister Sieivinger ta duna na e ley, ta esun corecto. "Nos consehero a bisa nos cu e NO ta corecto, e consehero di sr. Herde a bis'e cu e TA corecto. Pa evita discusion inecesario mi a pidi vice presidente di parlamento sr. Chris Dammers, pa e pidi Raad van Advies un conseho si e procedura cu minister Sievinger kier cana ta esun corecto of no. Pero sr. Dammers a bisami cu e NO ta pidi e conseho ey pasobra dos luna pasa el'a pidi Raad van Advies un conseho y Raad a nenga di dun'e un conseho, awel e no ta pidi Raad nada mas.
Mi a mustre cu e actitud ey ta masha infantil, cu cualquier pleito personal cu e por tin cu Raad van Advies, pa e regla su asunto, pasobra e no por perhudica henter un Parlamento.
Lamentablemente e no kier a cambia di opinion, mustrando claramente cu dictadura a drenta Parlamento bek. No a keda nos nada otro cu denuncia e acto dictatorial aki y falta di transparencia na Gobernador di Aruba. 
Cu esaki sr. Dammers ta confirma nos  impresion cu aki AVP tin hopi cos di sconde. Pasobra si nan no tabata tin nada di sconde, nan lo a djis pidi e conseho aki. Nos ta invita pueblo di Aruba keda pendiente pa e reunion aki dialuna awor 2 or di merdia pa haya sa kiko tur AVP kier sconde tras di e proyecto aki. Nos ta hopi preocupa pasobra e debe aki ta nos yiunan y nan yiunan lo bai pag'e, y no ta husto. Tin otro cosnan cu awor mester haya prioridad", lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co