Durante reunionnan di Comishon di Educashon di Parlatino y e Expo di Virtual Educa, nos a probecha reuni cu Diputado di Parlatino Venezuela Roy Daza riba e esfuersonan cu ta wordo haci na Aruba pa e reapertura di e refinería di Aruba.
Nos a informe resaltando e importancia di e refinería di Aruba como industria y pilar económico pa nos Pais y Pueblo. Nos a resalta na dje e hecho histórico cu e refinería di Aruba a wordo construi den anjanan ´20 explicitamente pa procesa-refina e crudo pisa Venezolano.
Nos a resalte e hecho histórico con Gobiernonan di Venezuela den anjanan ´80 a bira lomba pa e esfuersonan di nos Libertador Betico Croes pa haya un trato preferencial di Venezuela pa asina mantene e refinería di LAGO e tempo ey habrí. Mi solicitud na dje ta cu nos no kier historia ripiti. Nos digno Pueblo di Aruba awor mas cu nunca mester di e solidaridad di e Pueblo Venezolano y su Gobierno pa nos por logra e REAPERTURA di e refinería di Aruba.
Laga Aruba, nos Pueblo y nos juinan depende únicamente di turismo lo ta un irresponabilidad di marca mayor, pesey preserva e refinería di Aruba como industria y pilar económico ta di fundamental importancia pa futuro di nos Pais. Ademas ta bin aserca cu chensnan cu e exploración di gas den nos awanan territorial ta bayendo asina bon lo ta un crimen desmantela e refinería di Aruba.
Mi a informa Diptuado Roy Daza di e reunión cu a tuma lugar cu PDVSA últimamente, e reacción sumamente positivo di PDVSA, resaltando cu ta depende di e aprobación final di Presidente di Venezuela Nicolas Maduro pa PDVSA por sigi cu e projecto aki pa logra e reapertura di e refinería di Aruba. Mi a informe cu mi ta haciendo mi esfuersonan na tur nivel pa logra e aprobación aki den interés di nos Pueblo y futuro di nos juinan.
Aruba expresa semper solidaridad cu Venezuela, en lo particular mi persona semper a expresa e solidaridad aki: AWOR ARUBA MESTER E SOLIDARIDAD DI VENEZUELA…YUDA NOS HABRI E REFINERIA DI ARUBA.

Expresionnan haci den e articulo aki no necesariamente ta refleha opinion di ArenaPoliti.co