Representantenan di AVP constantemente ta bisa cu ta BAZV a wordo aumenta y no e BBO. Loke nan no ta bisa ta e hecho cu e BAZV aki ta di e mesun structura cu BBO y ora di entrega e sumanan concerni, esaki ta sosode hunto nificando cu no tin niun diferencia. Den e siguiente alinea mi kier splica dicon e ciudadano lo perde su poder di compra

BBO a bay di 1.5% pa 3.5%. E structura di BBO ta uno acumulativo cual kiermen cu cada biaha e wordo bendi y pasa un schakel esaki ta bira mas caro. Pa resumi e 3.5% di BBO finalmente por resulta den un aumento di aproximadamente 11%. 

Pa loke ta trata e transfer tax di 0.5%, esaki tambe lo tin su efectonan. Mester remarca cu e belasting aki ta aplicabel riba e salario mensual netto nificando cu ora nan caba di kita loonbelasting y primanan e belasting aki lo wordo aplica riba tur transaccion sin haci distincion. 

Ban bisa cu un persona ta gana 1500 florin netto pa luna. Door di e aumento di BBO ya awor bo placa no tin e mesun balor mas. Esaki ta nifica cu bo mester cuminsa na kita 11% di bo salario. Ademas di esaki bo mester kita tambe e 0.5% di e suma ariba menciona. Den su totalidad lo bay perde un suma di 162,50 florin pa luna. Un persona cu ta gana 2000 florin pa luna lo bay perde 230 florin pa luna. Un persona cu ta gana 3000 florin pa luna lo bay perde 345 florin pa luna. Asina por sigui duna mas ehempel con e medidanan aki ta afecta bo poder di compra.

Na 2016 gobierno tin pensa di haci un tipo di reforma di belasting, si esaki no ta bay tin un sistema cumulativo manera awor,  e ABB e tempo ey lo mester ta por lo menos 12% pa por bay cubri loke ta keda falta na entrada pa pais Aruba! Mi ta lamenta cu gobierno y lider di fraccion di AVP no ta asumiendo nan responsabilidad y ta continua na manipula pueblo. 

Expresionnan haci den e articulo aki no necesariamente ta refleha opinion di ArenaPoliti.co