Aruba awor bek riba e mapa di destinacion pa hungadornan di golf 

Gobierno di Aruba a inverti hopi den drecha nos infrastructura pa eleva e calidad di Producto Aruba cu e meta primordial pa atrae e bishitante afluente. Pesey un noticia positivo manera e partnership di Tierra del Sol cu un compania prestigioso manera Troon Golf ta mas cu bon bini. E mercado turistico di esnan cu ta practica golf ta un mercado cu sigur lo beneficia nos isla grandemente. Esaki a keda demostra den pasado.

Durante un conferencia di prensa na Tierra del Sol Minister Otmar Oduber a comenta cu den nos strategia di mercadeo, Golf sigur ta un di e atraccion treci dilanti. E mandatario ta bisa: “Intencion sigur ta pa pone Aruba bek riba e mapa di destinacion pa un di e mercadonan cu semper a sa di atrae e turismo di e calidad halto cu ta netamente e tipo di turista cu nos kier riba nos isla. Tin un grupo cu ta haciendo e investigacion necesario pa mira con nos por sigui mercadea nos isla cu un enfoke riba e mercado niche aki.” 

E compania Troon Golf ta entusiasma pa añadi Aruba como un destinacion nobo riba nan lista. Banda di tin 250 propiedad di golf, e compania ta enfoca na expone tur nan propiedadnan como destinacion. Aruba pa nan ta hopi special. Cu un database di contacto cu mas di 300 mil hungador di golf, nan ta cla pa anuncia awor cu Aruba tambe ta forma parti di e lista di destinacion cu nan tin pa ofrece. Troon Golf ta conoci tambe pa tin un network di mas di 70 club priva cu ta consisti di personan cu un entrada halto cu ta interesa pa e experiencia mas priva y exclusivo, di cual awor nan  lo por haya aki na Aruba. Tin hopi oportunidad pa traha tanto internacionalmente como riba mercadonan specifico pa atrae e bishitantenan afluente cu ta beneficia economia di Aruba.

E ehecutivonan di Tierra del sol den e dianan nos dilanti ta spera diferente bishitanan pa mira e posibilidad pa expande cu un hotel di 5 strea y duna sosten na e mercado di golf. E mandatario ta finalisa bisando: “Ta trata aki di un mercado di calidad halto cu ta riba e nivel eleva cual na e momento aki tanto oficina di turismo y Gobierno di Aruba ta buscando pa atrae mas ainda riba nos isla.”

Expresionnan haci den e articulo aki no necesariamente ta refleha opinion di ArenaPoliti.co