Dialuna ultimo e comision fiho di asuntonan di energia y refineria a reuni cu Minister de Meza. Den e reunion aki a papia tocante e ultimo desaroyonan di e refineria y posibel re-apertura di esaki. Nos a haya e informacion cu un comision oficial porfin a wordo instala y e miembronan aki lo ta haciendo nan trabou pa por yega na un posibel re-apertura. T’asina cu por lo pronto Valero a para tur accion di desmantelacion te cu fin di 2015. Mester enfatisa si, cu ta danki na e presion cu nos como oposicion a eherce y pa medio di diferente mocion esaki a bira un realidad.

Tambe a haci e Minister un pregunta relaciona cu e contribucion economico di un hotel den comparacion cu un refineria. El’a contesta cu e refineria tin mucho mas balor economico cu si compar’e cu hotelnan cu supuestamente lo bin pariba. Creacion di cuponan di trabou y contribucion na caha di gobierno sigur ta beneficionan cu ta resalta den tur pa nos pais. Ademas di esaki no mester lubida cu e lo trece bida bek den San Nicolas y lo boost e negoshinan den e area aki. Pasobra e realidad ta cu na e momento aki San Nicolas ta un ghost town y ora cu tin fiesta so ta core haci esaki pariba.

Loke ta importante pa trece dilanti ta cu e partner ideal pa opera e refineria ta esun di Venezuela, esta PDVSA. Un di e argumentonan ta pasobra e refineria na Aruba ta produci exactamente e producto cu Venezuela mester na e momentonan aki. Pa e motibonan aki lo no tin ningun tipo di barera pa un PDVSA establece su mes na Aruba. Nos di oposicion lo keda vigila di cerca e comision proponi pa gobierno y nos ta sigur cu tur e esfuersonan combina lo tin beneficio pa nos pais. 

Expresionnan haci den e articulo aki no necesariamente ta refleha opinion di ArenaPoliti.co