Den un esfuerzo pa resalta San Nicolas como e centro di nos herencia cultural tin varios proyecto encaminando. Cu un entusiasmo grandi, durante un conferencia di prensa na Scol di Arte na San Nicolas a anuncia un di e proyectonan cual ta Aruba Mural Projects – AMP.  

Cu e guia artistico di Robert Tromp, cu asistencia di UNOCA y Departamento di Cultura y cu sosten financiero di tanto UNOCA y Aruba Airport Authority, 15 hoben a keda selecciona entre 90, pa ricibi un tayer cu lo culmina den diferente arte riba muraya Pariba di Brug. Banda cu e proyecto Aruba Mural Projects tin un componente educativo, e ta un proyecto multifacetico.

E muchanan lo traha conhuntamente cu artistanan local unda nan na nan turno ta pasa conocimento na nos futuro talentonan. Hunto nan ta crea un otro atraccion pa San Nicolas. Nos bishitantenan no solamente ta sera conoci cu e historia di nos isla pero tambe lo mira aspectonan di arte contemporaneo. Pues e ta un conbinacion di diferente tipo di arte visual ilustrando nos cultura.

Un otro aspecto interesante ta cu ta trata aki di un arte den espacio publico, cual ta forma un dinamismo pa tanto nos bishitantenan como nos propio hendenan cu lo por para dilanti e murayanan y disfruta di esaki.

Aruba Mural Projects ta forma parti di un experiencia cultural masal, unda cu e bishitante no por bolbe su pais bek sin bishita San Nicolas.  Lo ubica cubiconan artistico den areanan turistico como un forma pa mercadea y haciendo e turista curioso pa bai mira nos centro di herencia cultural pariba di brug.

Locual a sobresali tambe ta cu ta trata aki di un proyecto di colaboracion di artistanan, di diferente generacion cu ta bin hunto pa atraves di arte conta un storia. Pesey ta asina importante tambe pa uni henter nos comunidad pa sostene nos artistanan local cu e bunita proyecto aki cu ta ta dirigi na mehora e Producto Aruba, no solamente pa e turista pero pa cada un di nos cu ta biba riba e pida baranca aki.

Expresionnan haci den e articulo aki no necesariamente ta refleha opinion di ArenaPoliti.co