A otorga e proyecto na Arubaanse Wegenbouw Maatschappij 

Minister Otmar Oduber a anuncia cu hopi entusiasmo cu for di luna di februari lo cuminsa wak trabounan ta wordo haci na San Nicolas cu lo hiba e ciudad aki un stap mas cerca di ta e centro di nos herencia cultural.
Recientemente e gunning di e renovacion di Promenade na San Nicolas a tuma lugar y Arubaanse Wegenbouw Maatschappij a gana esaki, convirtiendo su mes den e compania cu lo ta encarga cu e prome fase aki di revitalizacion di San Nicolas, renovando Promenade.
E proyecto tin un costo di riba 1.6 miyon Florin, lo cambia tur e klinkers, lo pone ‘solar trees’cu lo brinda mas iluminacion y den forma sostenibel. Intencion tambe ta pa trece e parti industrial na bida den e caya aki unda e banki y palo di luznan lo tin un toke industrial cu nan.
Lo incorpora diseñonan artistico di nos artistanan local den e caya y na e momentonan ta mirando cual ta e mihor manera pa haci esaki na e forma mas eficiente.
Hunto cu e desaroyo aki tin renovacion di edificionan historico tumando lugar, preparacion pa apertura di museonan, inversion di sector priva, arte publico, apertura den futuro di Cosecha y workshop pa artista y artesano y diferente otro proyecto cu lo conduci na e meta pa haci San Nicolas nos Capital Historico Cultural.
Minister Oduber ta satisfecho cu e diferente proyetonan y resultadonan cu tin te awor y a indica cu tin diferente otro na caminda. El a finaliza bisando cu esaki ta e prome fase y mas lo sigui mientras cu fase 1 a wordo prepara di tal forma cu e ta conecta cu fase 2 pa asina por tin un infrastructura uniforme.

Expresionnan haci den e articulo aki no necesariamente ta refleha opinion di ArenaPoliti.co