Diasabra mainta Minister Otmar Oduber a reuni cu diferente artista y operadornan di tour na San Nicolas pa asina presenta e vision cu Gobierno tin pa haci di e parti aki di nos isla nos capital di herencia cultural.

E mandatario a duna di conoce cu intencion tabata pa mustranan e idea di e totalidad cu ta bay tuma lugar na San Nicolas cu tur e renovacionnan, construccionnan cu ta tumando lugar den e area aki. Ya caba Nicolaas Store cu su reconstruccion y renovacion, na december ya caba e Museo Industrial na Watertoren lo ta habri y via DOW e aanbesteding ta den su fase final pa e renovacion di e prome fase di Promenade. Mientras tanto ya caba presentacionnan a wordo duna pa loke ta trata caya grandi  na San Nicolas hunto cu proyectonan manera Aruba Mural Projects y Community Museum entre otro.

“Bo ta mira cu e conhunto ta formando pa crea di e centro di San Nicolas e Cultural Heritage City di Aruba”, Minister Oduber a indica.

Oficina di Turismo di Aruba tambe tabata presente e mainta aki pa mustra e artesanonan cu e idea ta pa por atrae un cantidad grandi di turista pariba pa di e forma ey nan por intercambia cu e artistanan di Arubqa, pa nan por biba e arte cu nan ta haci, manera ta nan pintura, nan obra di man, nan baile, nan musica…y crea en berdad un icono di San Nicolas como atraccion nobo pa loke ta trata e producto cu nos ta presenta na e turista.

Minister Oduber ta bias cu a scohe pa no crece tanto den cantidad di hende, pero kier haya e bishitante afluente cual ta pidi pa tin mas cultura, mas di herencia di un pais y eeey ta loke ta creando na San Nicolas. Cu esaki por haci cu e turista ta gasta mas y ta lague atras den nos economia, den artesano y artistanan na San Nicolas y cuminsa asina crea un ripple effect hunto cu hotelnan na caminda, hunto cu otro desaroyonan cu ta wordo crea pa asina logra crea un di dos capital turistico na Aruba.

E producto aki ta uno cu no lo conoce final, e ta uno continuo, pero lo cuminsa mira hopi accion entre e prome kwartal y mitad di 2016. ATA ya caba a cuminsa planifica den nan mercadeo cu den ‘fall’ di 2016 lo cuminsa haci promocion fuerte pa loke ta trata e aspect cultural pariba di nos isla. Minister ta calcula cu lo cuminsa siente den e pati aki rond di mei- juni di 2016.

Tambe e mandatario a indica cu e biaha aki a Evita e discusion di kico ta bin prome, si e webo of e galiña y a pone nan tur dos hunto, pesey ta reuniendo cu e artistanan, ta cuminsando cu workshopnan, creando asina e ambiente pa ora e momento yega, ta den e top caba y e producto cu ta wordo ofreci na e bishitante ta uno cu e lo bay promove riba su social media bisando con bon el a pasa na San Nicolas, con bon e experiencia tabata den e Cultural Heritage Center di Aruba y asina aki nos sigui crece. E ta cuminsa lora na e momentonan aki, pero e lo sigui lora bira un bol grandi, Minister Otmar Oduber a finaliza bisando.

Expresionnan haci den e articulo aki no necesariamente ta refleha opinion di ArenaPoliti.co