Nos herencia cultural y fiestanan lo wordo pusha a traves di arte 

Robert Tromp ta e artista cu ta ehecutando e proyecto carga dor di Minister Otmar Oduber, Aruba Mural Projects (AMP). Trabounan cu artistanan y studiantenan cu a sigui e tayer ta andando caba y pa dia 29 di october Aruba lo por cera conoci cu AMP na San Nicolas.
E proyecto aki ta pa realiza muralnan (murals) na San Nicolas y a inicia den luna di juli durante cual a elegi e artistanan y a duna e tayer na diferente hoben interesa. Awor e proyecto ta asina leu cu nan ta cla pa presente na Aruba henter diahuebs 29 di october na San Nicolas na e rotonde banda di edificio di ex DOOV y dilanti Nicolaas Store (prome cu yega na e bus station di Arubus). Lo cuminsa cu e proyecto riba 7 pida muraya di Valero y deseo ta pa expande pa henter e caya (mas di 37 muraya) cu artistanan local y internacional.
E artistanan den e fase aki a wordo selecciona den un pannel cu tabatin. Un total di 4 artista a wordo selecciona y a dicidi di bay cu dos artista hoben y dos cu mas experiencia. E meta ta pa nan traspasa nan experiencia na e artistanan nobo pa asina e proyecto sigui crece.
E hobennan cu a sigui e tayer lo bay yuda e artistanan cu e realizacion di e muralnan basa riba loke nan a siña, mientras cu e artistanan lo ta dunando guia y tips na e muchanan.
Ya for di algun siman pasa a cuminsa sinta cu e artistanan pa e muralnan, tambe a sinta cu otro artistanan cu tin hopi proyecto y ideanan cu ta den proceso, pasobra ta trata di un colaboracion di artistanan y no solamente di e proyecto di muralnan.
Robert no kier a duna mucho detaye riba kico e proyecto riba su mes ta encera, el a bisa cu e ta prefera pa mantene un tiki den secreto te dia 29 di october. Unico cu el a bisa ta cu kier pusha nos herencia cultural, fiestanan di Aruba y esaki a traves di arte.

Expresionnan haci den e articulo aki no necesariamente ta refleha opinion di ArenaPoliti.co