Ultimo dianan nos por a tuma nota di hopi acontecimentonan cu ta indica cu e partido na mando ta perdiendo su sosten den pueblo na un gran forma. Ta bisto cu e gobierno no tin como prioridad proteccion di nos ciudadanonan, y ni tampoco e gobierno aki ta duna muestra di tin compasion cu un pueblo cu semper a contribui sagradamente na e desaroyo di nos Pais, pero cu awor aki ta wordo diariamente confronta cu un maneho anti-Aruba. Un maneho cu ta causando hopi dolor den hopi hogarnan aki na Aruba pa causa di medidanan inhumano.

Pero no ta e medidanan inhumano contra nos pueblo so ta loke e gobierno aki a bin ta azota nos pueblo cu ne; tambe a percura pa un perdida di nos autonomia, manipulacion cu cifranan di turismo y firmamento di contractnan cu ta yena saco di financistanan di campaña di AVP.
E resultado di tur e actonan devastador cu e gobierno a bin ta ehecuta consecuentemente e ultimo 5 aña, ta cu e pueblo a cuminsa lanta for di soño y poco poco ta demostrando mas abiertamente nan disgusto y asco contra e gobierno maligno aki.

For di siman pasa caba nos por a ripara cu e "spindoctors" di e gobierno actual a cuminza cu un racha nobo di manipulacion den medionan di comunicacion y riba e rednan social. A cuminsa mustra riba tur e biyones di dollar cu e hotelnan na Aruba lo bay ta inverti pa mehora nan producto. Tambe a core tene un encuentro na Carnival Village na unda a rifa un auto pa 1 florin. Asina nos por a tuma nota di con politiconan y algun directornan "comprometi" ta purba di trece e "bon" noticia den pueblo.
P.e. e apoyo di e "Green Corridor" door di e director di DOW, un funcionario di HOH cu ta presta su mes pa yuda cu e manipulacion cu e proyecto corupto di hospital, y alabes diripente ta informa cuanto "ilegal" ta wordo gará y deporta. Pero esun cu a corona e obra maestro di manipulacion di nos pueblo ta e anuncio hipocrita di e minister di Labor Paul C. cu a anuncia e "Gran" noticia cu lo no permiti ningun musico stranhero bin traha aki na Aruba mas.

Permitimi ilustra con hipocrita e minister aki ta: a aparece un documento unda e minister mes a duna e instruccion, of en todo caso a bay di acuerdo, cu ya caba despues di 3 aña un trahador stranhero no mester bay Departmento di Labor (Jobcenter) mas. E consecuencia di e decision aki ta cu jobcenter no por determina mas si tin Arubiano pa haci e trabow.
Ta igualmente interesante pa sa cuanto ta e cartanan cu e mesun minister aki ta manda pa DPL pa duna instruccion pa cambia conseho, ora cu funcionarionan di DPL ta mustra cu tin Arubiano pa haci e trabow, y tambe lo ta interesante pa haña sa cuanto di e "ilegalnan" cu mester a wordo deporta, lo a presenta na aeropuerto cu un carta firmá pa e minister concerni cu un "ontheffing" di e tempo cu e no mag di drenta Aruba.
Alabes nos a tuma nota di e hecho cu tin un chines cu a wordo controla recientemente y e chines a yama e mesun Paul C. y e chines a pasa e telefon pa e empleado na unda Paul C. a bisa e ambtenaar pa no haci control eynan. Y awor e Paul C. aki kier bin hunga e defensor di e clase trahador Arubiano.
Tipo di actonan aki no ta cay bow di CORUPCION???

Biniendo back riba e asunto di cambio di maneho riba e asunto di 3 aña, mester ser bisa cu esaki, banda di e hecho cu ya caba un Mericano no mester bay ni UN biaha Jobcenter, esaki ta nifica cu nos por bisa ayoooo na cuponan di trabow pa nos propio Arubianonan.
Pakiko nos ta bisa asina?
Ta conoci cu e gran mayoria di e empresanan grandi aki na Aruba ta den man di Mericano, dus eynan ya caba nos Arubianonan mester bay competi cu e Mericano cu ya no mester bay mercado laboral. Mescos cu ta conta pa Hulandesnan Europeo. Y awor pa completa e obra, TUR otro stranhero no mester bay DPL pa mira si tin Arubiano pa haci e trabow.

Si nos tuma den consideracion cu gran mayoria di estudio ta dura 4 pa 5 aña, esaki ta nifica cu ora cu nos Arubianonan caba nan studio, ya caba tin un stranhero riba e stoel ey. Sin conta cu basá riba e tratado asina yamá "family-life", e casá y e yiunan MESTER wordo admiti. Esaki kiermeen cu di awor padilanti no tin trabow pa nos Arubianonan, ni lo bay tin scolnan pa nos muchanan Arubiano.
Pa pone e cherrie riba e corupcion cu tin den henter e asunto di permisologia, ata awor e minister encargá cu DIMAS ta nombra un di su ambtenaarnan mas corupto como Adjunct Directeur na Dimas. Awor e fiesta ta bay bira un bacanal di berdad.
E minister encarga cu Dimas ta duna instruccion na Radhi Kahn pa haci actonan contra ley, y probablemente contra pagonan astronomical, y e mucha manda aki na su turno ta manda un señal pa e otro "handlanger" cu ta un tal Mario Wever, cu awor a wordo recompensa cu e posicion di Adjunct Directeur, ni cu esaki probablemente ni tin un diploma di Mavo y cu a drenta Dina como bode y awe e ta Adjunct Directeur.
Sin ningun clase di solicitud habri y pasando un cantidad di hendenan cu educacionnan hopi avansa.
Den un proximo articulo nos lo bay mustra con e directora actual a ser corta formalmente, y cu e mucha manda aki lo ta totalmente encarga cu otorgamento di permiso. Awor e bacanal y e bonche ta bay sinta y ta bay haya un forma  espectacular.
Unda sindicatonan y gremionan ta keda?

Te ki dia nos ta bay keda acepta e cosnan aki di e gobierno y e gobernantenan maligno aki? E ora zero a yega pa nos sociedad Arubano. Si no para e rumbo cu nos ta bay, dentro di masha poco E ARUBIANO lo ta un INDIGENA cu lo bay bira un ser humano cu por ser mira como un atraccion turistico den Parke Arikok. UPP cu ta e partido cu ta para pa e "ARUBIANISACION" lo deshaci di e maneho anti-Arubiano aki, y lo bay duna balor na e ARUBIANO.
Nos ta cla pa e lucha aki, y den a caso aki ta "E ARUBIANO SÓ POR SALBA E ARUBIANO".

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, juli 9, 2015

Expresionnan haci den e articulo aki no necesariamente ta refleha opinion di ArenaPoliti.co