No tabata tin regla ni orden. Fanaticonan di MEP / Grupo di 7 a daña e reunion. 

E debate cu e organisacion PARA a organisa lo mester a trata e tema di re-apertura di e refineria. Enbez di esey ela bira un reunion pa exigi cu sr. Nelson English bira miembro y hasta presidente di e comision cu gobierno a instala pa un biaha mas busca forma pa re-apertura di e refineria.  E invitadonan pa e debate no a wordo informa di antemano di e tema real. Nan a bin pa papia riba re-apertura di e refineria. Pero for di comienso di e reunion e intencion di e debate a resulta uno completamente diferente. Te cu a bini pa exigi pa sr. Nelson English drenta den e comision.

DESORDEN
E organisadornan di e debate obviamente no a prepara niun regla pa e debate y no tabata tin niun forma pa tene orden. E publico cu a presenta tabata consisti en particular di fanaticonan di MEP, miembronan di MEP y miembronan di grupo di 7. No a laga e invitadonan papia. Esan cu tabata tin un opinion riba re-apertura di e refineria cu tabata diferente cu e fanaticonan di MEP a haya un  "boe" y gritamento di e majoria den e publico. Hasta a ofende e representante di Camara di Comercio na un forma masha baho. Na mas cu un ocasion miembronan di e panel a hala atencion di e moderador sr. Rafael Croes y miembronan di PARA, pero nada no a cambia. E desorden a sigui henter anochi. E desorden mas grandi tabata cada biaha un di e invitadonan bisa algo cu e publico no kier a tende. Na final e presidente di PARA sr Jaime Falcony a mustra e publico riba e compotacion aki, pero esey tabata laat caba. Lastimamente, un reunion cu mester a bira un intercambio di informacion y punto di bista pa informa esnan presente, a bira un reunion completamente desordena y cu otro tema cu pa cual e panelistanan a wordo invita. Enbez di laga tur hende papia y duna nan opinion, ela bira uno di haci desorden, di tira palabra y ofende hende.

SPLICA PUEBLO
PARA tin cu splica awor ta kico ta realmente nan intencion. Nan kier re-apertura di e refinieria of nan ta busca trabao pa sr. Nelson English? Y pakico tanto buya pa un persona Nelson English. E simpel echo cu ta haci tur e desorden aki pa un persona haya trabou siendo cu tin un comision cu 6 experto Arubiano ta trahando, ta lanta hopi sospecho cu aki tin algo straño pasando. Ta kico ta e met real di PARA? Pakico Nelson English? Pakico no a grupo di experto Arubiano cu a wordo forma caba?
MEP a demostra atrobe cu su fanaticonan cu nan intension NO ta pa traha cu tur hende a base di respet. Atrobe. a keda demostra cu MEP y Grupo di 7 ta uno y mes un grupo! Pasobra ayera nochi e fanaticonan di MEP y grupo di 7 tabata uno. Nan a bolbe haci desorden, ofende hende cu a wordo invita y falta tur clase di respet pa hende y niun momento e lider di MEP a haci algo pa corrigi su fanaticonan. Ta kico pueblo por spera di e gruponan aki awor?

Expresionnan haci den e articulo aki no necesariamente ta refleha opinion di ArenaPoliti.co