Segun Rene Herde di AVP, e refineria lo tabata tin un bon futuro si gobierno di MEP a acepta e proposicion di Valero pa inverti mas cu un biyon dollar pa renoba e refineria. Esey lo a pone e refeneria den condicion pa produci mas eficiente y lagu'e competi cu refinerianan mas moderno. MEP a nenga e oferta ey y a exigi mas placa. Pesey e refineria a sera pa di dos biaha. Tur dos biaha bou gobierno di MEP. E placa mes nunca pueblo a wak nada didje!

AWE
Mientrastanto e refineria a cay atras y lo costo hopi mas pa pone bek den condicion pa traha y gana placa. Awor cu e mercado di petroleo na henter mundo ta asina insigur y e prijs di petroleo ta asina abou, ta mas dificil cu antes pa haya un cumprado cu hopi placa y hopi petroleo crudo pa cumpra y opera e refineri pa hopi aña. Hasta si e compania tin su propio petroleo esey ta mas dificil cu tempo di e oferta di Valero na MEP. Den e situacion aki awe, cu menos perspectiva pa e refineria bolbe habri, gobierno di Aruba y comercio local a cuminsa traha plannan pa un bon uzo di e tereno caminda e refineria ta awor. E prome plannan ta parce di ta masha interesante. Si realisa e plannan aki e lo nifica un futuro completamente nobo cu un economia completamente limpi pa San Nicolas. E futuro nobo aki pa henter e area di Savaneta te Colony ta asina bunita, cu ta parse cu ta esaki ta loke ta pone MEP y PDR preocupa y cuminsa grita pa stroba. MEP y PDR ta parse di kier tene na un pasado cu e refineria. Den tur loke nan haci ta mustra cu nan kier stroba San Nicolas di haya un futuro completamente nobo.

LOKE SAN NICOLAS MES KIER
Kisas MEP y PDR mester cana mas den San Nicolas pa nan tende con Pueblo di San Nicolas si kier e futuro limpi y bunita pa e area cu nan ta biba aden. Kisas MEP y PDR mester siña acepta cu Pueblo di San Nicolas kier wak un futuro diferente cu di pasado y diferente cu esun di Playa. Un futuro economico  cu ta bon pa San Nicolas y bon pa henter Aruba. Ta riba e futuro aki gobierno di Aruba a cuminsa traha, mientras cu e porta pa un reapertura di e refineria ta keda habri pa awor.  Pero e no por keda habri pa semper y laga Aruba y San Nicolas sigui pega den pasado. Un pasado cu tabata bon pa Aruba, pero cu kisas a pasa di berdad definitivamente 'pa pasado'. E porta pa un reapertura a corto plazo ta keda habri, pasobra ken no kier e contribucion di e refineria cu mas trabou y mas entrada pa Aruba?

Expresionnan haci den e articulo aki no necesariamente ta refleha opinion di ArenaPoliti.co