E bario tin hopi reto pa atende y “Gobierno tey pa duna un man” 

ORANJESTAD – Prome Minister Eman na final di dia a keda hopi satisfecho di un bishita realisa na Sabana Basora Noord como Accion di Bario. “Sabana Basora tin su retonan, mescos cu tur bario, pero por mira cu e mesun ciudadanonan ta tumando rienda di nan bario pa tene actividad y pone nan bario den un bista positivo.” Esaki e mandatario a duna di conoce diahuebs merdia despues di a cana pa algun ora den e bario cu tin e compleho di FCCA.

Prome Minister Eman a percura pa pasa na mas tanto cas posibel, specialmente pa scucha cual ta nan preocupacionnan, relaciona cu e casnan den cual nan ta biba, pero tambe di e necesidadnan di e bario y e problemanan social existente cu nan ta trahando pa soluciona.

Team BoBario, cu ta cay bou di Ministerio di Asuntonan General, a logra haya cooperacion di e organo deportivo AVB pa haci entrega riba e dia aki di un cantidad di bala cu ta bay wordo uza pa e evento cu ta bay tin den cuadro di celebracion di Dia di Rey. “Conta cu nos Team BoBario, AVB y cu Gobierno. Nos tur t’ey pa duna boso un man den boso esfuersonan pa trece e bario den un imagen positivo y brinda recreacion sano. Hunto nos por supera e momentonan dificil cu nos barionan ta pasa aden y cu un luz na horizonte door di mayornan hopi dedica cu ta busca algo sano pa e muchanan.” 

E mainta aki di Accion di Bario, cu tabata un di esnan mas largo y mas hopi cas bishita, a conta cu presencia di Bus di Salud, cu for di oranan tempran di mainta a cuminsa pa atende e grupo grandi di habitantenan cu a acudi pa realisa nan check-up. Te den oranan di merdia por a constata cu e habitantenan cu kier haci uzo di e bus di salud tabata grandi.

E mandatario a scucha e comision di e bario, cu tin apenas 2 luna den operacion y cu ta guiando specialmente hobennan, tratando pa duna nan un guia pa mihor. Den cuadro di esaki tambe e comision a combersa ampliamente cu Prome Minister Eman durante e caminata. A sugeri e comision pa mira con nan coleganan di Juwana Morto ta funciona. Pero tambe a papia di e retonan cu e bario ta confronta cu ne y ta mirando con por duna un man. E mandatario a priminti tur cooperacion pa inspira e bario pa uni y trece actividadnan comunitario.

Expresionnan haci den e articulo aki no necesariamente ta refleha opinion di ArenaPoliti.co