Impulso economico di wafnan nobo ta bay traduci den miho calidad di bida pa ciudadanonan 

ORANJESTAD – Contento y orguyoso, asina Prome Minister a describi su sentimento mientras e tabata presencia un momento historico diahuebs  mainta na waf di container na Oranjestad. Ekiponan di experto tabata realisando e traslado cuidadoso di e grua. E ekipo cu ta pisa miles y miles di ton, a keda poni den transcurso di ayera riba e embarcacion ‘Crucer’ di e compania BigLift pa asina den oranan di diabierna marduga, sali direccion pa Barcadera. Premier Eman hunto cu coleganan de Meza y Sevinger a bay personalmente pa wak con e operacion ta canando.

Den su reflexion el a realisa e magnitud di e momento cu nos isla ta bibando aworaki. Prome Minister Eman a recorda historia di Aruba mencionando cu no ta prome biaha nos pueblo mester enfrenta adversidad pa habri caminda pa progreso. Na comienso di siglo pasa “un poblacion chikito, humilde pero determina kier a traha un waf y nos tabata wordo obstaculisa pa e sistema central di gobernacion. E ora ey a lanta e lucha pa un dia Aruba bira baas den su mesun cas.”

Para na e waf cu a wordo construi a base di e sentimentonan ey dor di Cornelius Eman, su bisawelo y cu e kade ta carga su nomber, Minister President a papia di con un generacion nobo a tuma decisionnan importante pa expansion y modernisacion di waf y construccion di un waf di container completamente nobo; sin duda algun, algo hopi grandi. “Esaki ta djis un momento mas den e realisacion ey,” refiriendo na e trabou cu tumando luga su tras.

“Barcadera poco poco ta kedando cla y dunando espacio pa nos haci di waf di Playa uno mas competitivo den nos region pa cruceronan y conecta esaki cu centro di ciudad,” asina e mandatario a splica. Otro proposito cu ta acopla na e proyecto aki ta pa haci e waf mas accesibel pa e comunidad. “E conexion entre poblacion ta nos enfoke pa medio un area bunita pa e turistanan, pero tambe pa nos hendenan.”

Gabinete Mike Eman II a fiha e vision aki tres aña pasa y a topa cu hopi obstaculo. “Pa 30-40 aña a wordo papia, pero nos si a para duro y bisa cu ta kita e obstaculonan fe caminda y realisa un soño grandi pa Aruba,” Prome Minister Eman a relata. Ta conoci cu e desaroyo di waf ta bay tin un impacto enormemente grandi riba economia y calidad di bida di nos ciudadanonan. Relaciona cu esey, Premier Eman a compronde cu “lo percura pa traduci esaki den un forma di bida prospero pa tur hende na Aruba. Esey ta e enfoke di nos Gobierno.” 

Expresionnan haci den e articulo aki no necesariamente ta refleha opinion di ArenaPoliti.co