Desde cu Gabinete Mike Eman a sinta na final di 2009 varios ta e institutonan Hulandes cu a ser treci Aruba, caminda gobierno di Aruba ta pagando sumanan astronomico for di caha di pueblo pa ubica e institutonan aki den e edificionan di huur, manera ta e caso cu TNO y Rietveld Academie.

Graduacion na Hulanda
Un di e edificionan di huur cu a sobresali pa pago di sumanan astronomico ta e edificio den Wilhelminastraat (ex-Brenchi) caminda Gabinete Eman desde februari 2013 tin e edificio aki na huur pa ubica e instituto Hulandes Rietveld Academie. Huur pa luna ta 50 mil florin, pues desde 2013 te cu awor a paga un suma total y astronomico di 1.5 miyon florin. Remarcabel ta cu un gran parti di e periodo di huur, e edificio a keda para bashi.
Partido MEP ta trece e historia cortico aki un biaha mas padilanti, ya cu siman pasa nos por a mira cu hopi orguyo con un studiante Arubana a gradua den ramo di audio visual na Rietveld Acadamie, no na Aruba, pero na Amsterdam (Hulanda). Siguramente e studiante aki no ta e prome y ni e ultimo pa gradua na un instituto renombra na Hulanda y ta demostra cu nos Arubianonan tin e capacidad pa sigui exitosamente cualkier estudio y na ki parti di mundo.

Gobierno no tin piedad
Ta pesey e hecho cu gobierno di Aruba ta pagando un suma astronomico na huur pa ubica un instituto Hulandes manera Rietveld Academie na Aruba djis pa laga algun studiante Hulandes sigui nan estudio aki ta muestra cu gobierno no tin ningun piedad ni gevoel cu placa di pagadornan di belasting. Hecho ta cu Aruba no ta e pais di mas rico na mundo pa gobierno haci sorto di atraco asina. Al final nos lo mira cu mayoria di nos muchanan Arubano lo sigui nan estudio na Hulanda, mientras cu nos lo haya studiantenan Hulandes cu lo bin Aruba pa sigui nan estudio aki. No ta nada malo, pero e unico diferencia ta cu na Hulanda gobierno Hulandes si lo no bay paga huur pa un instituto Arubano manera por ehempel IPA ser ubica na Hulanda pa duna les na studiantenan Arubano cu lo bin for di Aruba. Esaki nos ta yama e mundo riba su cabez y sin duda un distribimento sin piedad di placa di pueblo door di Gabinete Mike Eman.

Expresionnan haci den e articulo aki no necesariamente ta refleha opinion di ArenaPoliti.co