Impulso pa economia, empleo y un cuadra di infrastructura pa un etapa nobo di progreso 

ORANJESTAD- E periodo tras di lomba ta uno colma cu desaroyonan positivo pa pais Aruba. Un periodo cu ta wordo ilustra door di proyectonan cu ta percura pa un etapa nobo di progreso pa nos pais. Na Barcadera trabounan grandi ta andando pa loke ta construccion di e containerhaven nobo. E grua cu ta necesario pa un containerhaven di e indole ey, a yega Aruba y ta wordo arma durante e lunanan benidero. Reconstruccion y ampliacion di hospital tambe ta bayendo full speed pa keda cla dentro di e periodo stipula. Algun siman pasa a firma e contract cu banconan internacional pa cuminsa cu e proyecto grandi Green Corridor.

Cada un di e proyectonan aki ta necesario pa Aruba por sigui desaroya su mes y brinda miho servicio na su propio hendenan y su bishitantenan. Mudamento di waf di carga (containerhaven) di Playa pa Barcadera, tabata desde un inicio den en e plannan di Gabinete Mike I y ta wordo realisa bou di e gobernacion nobo di e mesun signatura. Na e containerhaven nobo ta bay tin entre otro edificio di inmigracion, douane y polis.Tin suficiente tereno pa unabes e waf bira un hub por sigui amplia su facilidadnan. Ora e trabounan keda cla, e waf di carga por ricibi barconan di carga grandi y por acomoda tres barco grandi na mesun momento. Barconan tambe por baha nan mercancia na Aruba y for di aki manda esaki pa nan destinacion den Latino America y Caribe. Construccion di waf nobo di container na Barcadera ta forma parti di un vision di Gabinete Mike Eman pa asina finalmente duna oportunidad na waf di Playa pa wordo desaroya como waf crucero den un area cu ta directamente conecta cu centro di ciudad y Caya Grandi renoba.

Reconstruccion y ampliacion di dr. Horacio Oduber Hospital tabata necesario mirando cu desde su construccion na 1976 e edificio no a conoce cambionan infrastructural grandi. Mientrastanto e poblacion a crece y facilidadnan na hospital a keda mescos. Siman pasa despues di a haya un presentacion na hospital y un recorido na e sitio di construccion Prome Minister Eman a keda impresiona pa tur loke el a mira pa su mes.

“Tabata impresionante den mas di un sentido. Un di nan ta e cantidad di construccion andando y sigur e impacto economico cu esaki tin pa pais Aruba. Esey ta  importante, pero mas importante ta e meta cu gobierno a pone su dilanti pa loke ta e hospital aki, esta di tin un hospital bon ekipa na unda por brinda mas servicio di calidad. Banda di recosnteuccion y ampliacion hospital ta dunando cursonan tambe na su personal pa por brinda serivicio specialisa na e pashent.

Green Corridor ta otro proyecto cu ta bay tin su impacto economico positivo pa pais Aruba. Green Corridor ta un proyecto cu ta bay percura pa pariba di brug haya miho acceso y e hendenan eynan un miho calidad di bida. Banda di percura pa cuponan di trabou, miho fluho di trafico pa y for di pariba di brug, Green Corridor ta percura tambe pa un embeyecemento entre e careteranan y e casnan for di Pos Chikito, Savaneta, Zeewijk, Brazil, Cura Cabai, Mabon te cu San Nicolas. Pariba di brug y particularmente San Nicolas, mester di e proyecto aki pa asina por ta mucho mas accesibel pa entre otro turistanan, pero tambe pa por desaroya e potencial economico di e miho manera cu ta posibel, awor cu e refineria no ta den operacion mas.

Expresionnan haci den e articulo aki no necesariamente ta refleha opinion di ArenaPoliti.co