E no ta un tendencia di vuelonan inaugural cu diripiente ta tumando luga

Diabierna a tuma luga un acto oficial pa lansa un ruta nobo pa Estados Unidos di Aruba Airlines. E vuelo pa Miami lo ta un di e prome rutanan di Estados Unidos pa Aruba Airlines.  Durante e presentacion di Minister Oduber, e ta reitera e hecho ta creando posibilidad di mas negoshi pa nos isla banda di e posibilidadnan nobo pa turistanan cu ta bin di tur parti di mundo, haciendo e mas accesibel, tin tambe e posibilidad di uza Aruba como hub.

Ya caba for di aña 2009 Minister Otmar Oduber despues di a asumi e posicion como Mandatario di Gabinete Mike Eman I, a bishita Hulanda unda a reuni cu representantenan di KLM pa convence nan pa bin bek Aruba y a presenta na nan e vision di crea di Aruba un hub. Di e tempo ey caba mesora a cuminsa traha pa haci di e vision aki un realidad. Inversionnan den infrastructura di nos aeropuerto a tuma luga y ta sigui tuma luga pa por carga e vision aki. Mas y mas ta mira Aruba como un hub mirando e posibilidadnan di conectividad cu nos tin cu e cantidad di gatewaysnan cu a crea. Awendia nos por brinda vuelonan directo pa Estados Unidos, Centro America, Latino America y tambe pa e continente Europeo.

Minister Oduber ta bisa: “No ta sin mas un aerolinea ta habri, of ta sin mas ta dicidi di amplia rutanan. Tur esaki ta parti di e vision di crea di Aruba un hub y haci e centro di distribucion pa loke ta trata e negoshi di aerolineanan den e region aki.”

Aruba Airlines tambe ta forma parti di e vision aki cu nan rutanan pa Estados Unidos. Ampliacionnan lo continua manera cu a planifica algun aña pasa, cu vuelonan adicional for di Corsou y pa Sur America entre otro mas vuelo pa Brazil. Cu tur e vuelonan adicional y ampliacionnan tumando luga, companianan di Aerolinea manera Aruba Airlines ta expande creando mas cupo di trabou. Aruba Airlines mientrastanto a crece y awor ta conta cu un total di 230 empleado.

Minister Oduber a termina felicitando e empleadonan cu ta percura pa un producto di calidad halto pa e usuarionan y deseando nan exito cu tur e ampliacionnan na caminda.

Expresionnan haci den e articulo aki no necesariamente ta refleha opinion di ArenaPoliti.co