ORANJESTAD- Discurso nacional di Fin di Aña di Prome Minister Mike Eman tabata enfoca riba metanan y vision cu nos ta pone nos dilanti y riba e cambio di rumbo cu a tuma lugar na Aruba na fin di 2009 ora su gobierno a tuma rienda di pais Aruba cu e tempo ey tabata un pais den decadencia. E cambio awe ta bisto den tur skina di e isla aki. Un cambio cu a bin door di e confiansa grandi cu pueblo a dune y su Gabinete y na 2013 un biaha mas. Tabatin un vision cu   tabata basa riba un compromiso di curazon. No tin un prijs ni con halto pa paga pa cumpli cu honor y dignidad di e confiansa cu pueblo a dun’e y su gobierno. 

• Green Corridor, avenida di cuater via pa San y ta inclui un “fietspad” acopla na Linear Park di Playa te San Nicolas;
• Hospital nobo y moderno anexo na Horacio Oduber Hospital completamente renoba y modernisa;
• Construccion di un waf nobo di container na Barcadera, cu e aña aki ta keda cla y un renobacion y embeyecimento impresionante di waf di Crucero na Playa;
• Inicio di e proyecto di Ringweg cu construccion di un caminda di 4 via rond di centro di ciudad, Watty Vos Boulevard; cu ta inclui fase 3 y 4 di Linear Park di Eagle Beach pa Palm Beach;
• Realisacion di e expansion grandi di nos capacidad di energia renobabel cu instalacion di panelnan solar riba scolnan tur rond di nos isla y inicio di e di dos Parke di Molina cu hunto ta trece Aruba na 50% di energia sostenibel; un cifra record den mundo;
• Mes importante ta e trabounan cu nos ta sigui den barionan; mi ta orgoyoso ora mi mira famianan contento na Sero Biento of Otaheitistraat cu nan caminda y trotoir; na Juana Morto, Pos Chikito, Yara, Madiki, Bushiri, Seroe Patrishi cu nan bario renoba. E alegria den casnan humilde na Papaya, Pos Abou, Sabana Grandi, Ayo cu iluminacion a yega den nan caya. Den e aña nobo e proyecto di Luz den Bario ta inicia cu yegada di 12.000 punto di luz led nobo. Den barionan nos ta bay ta poniendo tambe canchanan deportivo pa nos hobennan por disfruta di deporte riba yerba. Na RCA y Bushiri nos a caba di termina un proyecto asina, na Madiki uno mas ta biniendo cla y tin un totalidad di 20 pa wordo realisa den e siguiente dos añanan aki, di Montserat pa Jan Flemming, di Seroe Patrishi pa Cura Cabay, tur rond Aruba nos ta treciendo e canchanan aki.  
• Na Noord nos a pone den operacion e prome MFA y e siguientenan lo ta na  Paradera, Savaneta, Santa Cruz y San Nicolas. E centronan aki cu ta bira tambe areanan pa grandi y chikito tin facildadnan di encuentro, recreo y formacion.  
• Renobacion y modernisacion di enseñanza di nos yiunan ta sigui tin prioridad mayor den e añanan nos dilanti. Nos educadornan lo haya un miho pocision huridico. Innovacion y desaroyo di ciencia na Aruba ta haya un lugar strategico den e metanan di nos pais. E aña escolar nobo nos ta inicia amplia e programa  “Nos Atardi” pa tin scol merdia y atardi pa hobenan di scolnan secundario.
• Hunto cu FCCA y otro partnernan nos lo construi e centenares di casnan pa famia hoben y pa adultonan mayor. Tambe den e siguiente dos añanan lo intensifica otorgamento di tereno pa construccion di cas propio. 
• Den e periodo lo sigui desaroya e di tres pilar economico pa nos pais basa riba tecnologia, conocemento haciendo uzo di Aruba como brug entre dos continente. Un economia di conocemento pa Aruba a cuminsa mira resultado positivo y prometedor den areanan relata na energia y otronan. Nos ta promove e desaroyo aki pa diversifica Aruba su economia mas aleu.”

Expresionnan haci den e articulo aki no necesariamente ta refleha opinion di ArenaPoliti.co