Prome Minister Eman “Tur ta desaroyonan nobo di un etapa nobo di progreso” 

 ORANJESTAD- Despues di e haya un recorido di inspeccion y splicacion di tur loke ta tumando lugar pa loke ta ampliacion y renobacion di dr. Horacio Oduber Hospital, Prome Minister Mike Eman a haya tur loke el a mira y tende imponente y interesante. “Loke ta sosode awe aki ta pa mayan por duna e tratamento medico di calidad cu nos a priminti comunidad di Aruba.”

“Ta bay bin 140 camber pa pashent den e hospital renoba. Na e momentonan aki e cambernan den hospital ta pa acomoda 4 te 6 pashent. Ora e hospital renoba keda cla esaki ta bay cambia. Ta bay bin cambernan mas priva cu un of dos pashent aden. Esaki naturalmente ta un cambio hopi grandi cu ta cuadra cu e filosofia di gobierno di un pais di cinco strea.”

E impacto di renobacion y ampliacion di hospital ta bay ta uno grandi. Eman a splica cu tin ekiponan nobo biniendo di exterior. Medico y enfermeronan ta wordo prepara, tin cursonan andando, ta bin cu un dr. HOH Academy banda di un proyecto den cooperacion cu EPI. “No ta unicamente e edificio ta haya su debido reconstruccion, pero tambe ta bin cambionan grandi den contenido di e servicio medico. Un servicio cu nos hendenan ta pidi p’e ta bay bin dentro di poco despues cu 30 aña largo a papia hopi riba e tipo di cambionan aki, pero cu nunca a wordo realisa.”

Eman: “Awe nos ta para aki na hospital dilanti un joya di un proyecto. Ayera nos tabata para na waf di Barcadera na unda e containerhaven nobo ta andando. Un otro proyecto importantisimo pa desaroyo di Aruba. Otro siman nos ta bay ta para na inicio di e vierbaansweg cu embeycimento di espacionan publico entre caminda y e casnan den e barionan unda e caminda aki ta pasa di Pos Chikito, Savaneta, Mabon, Brazil, Zeewijk te San Nicolas.  Tur esaki ta cambionan transcendental pa Aruba por conoce un desaroyo nobo di un etapa nobo di progreso. Mi ta hopi orguyoso cu nos ta liderando esaki y cu por wak e resultadonan.”

Expresionnan haci den e articulo aki no necesariamente ta refleha opinion di ArenaPoliti.co