Despues di presentacion y recorido di inspeccion na dr. Horacio Oduber Hospital  

ORANJESTAD- Diahuebs merdia tabatin un presentacion na dr. Horacio Oduber Hospital pa Prome  Minister Mike Eman y Minister di Salubridad Schwengle duna door di di SOGA y AIB hunto cu hospital encuanto e ultimo desaroyonan pa loke ta reconstruccion, renobacion y ampliacion di hospital. Algo cu ta necesario mirando cu desde su construccion na 1976 e edificio no a conoce un ampliacion mientras cu e poblacion si a crece grandemente. Despues di e discursonan cortico na unda varios imagen a keda presenta, a sigui un recorido na e sitio di construccion. Aki e ministernan y demas invitado a haya splicacion di e trabounan andando. Trabounan cu ta canando segun schedule.

Prome  Minister Mike Eman, un di e motornan tras di e inmenso proyecto aki, a bisa di a keda masha impresiona pa tur loke el a mira y tende. “Tabata impresionante den diferente sentido. Un di nan ta e cantidad di construccion andando y sigur e impacto economico pa pais Aruba. Esey ta  importante, pero mas importante ta e meta cu gobierno a pone su dilanti pa loke ta e hospital aki.” Eman a bay bek na fin di 2009 na momento cu su gabinete a tuma rienda di pais Aruba. E tempo ey hunto cu Minister Visser a start cu e proyecto aki. Un proyecto cu awor ta cay bou responsabilidad di Minister Schwengle. Eman a enfatisa cu Aruba tabatin hotelnan di cinco strea, pero cu hopi di e facilidadnan necesario pa e comunidad manera scol, bario, hospital, waf y centronan di ciudad no tabata cana pareu cu e nivel di desaroyo cu por a mira den turismo. “Esey ta trece un desekilibrio den e desaroyo socio-economico.”

“Nos a pone un meta fiho y grandi nos dilanti”, Eman a splica. “Esaki ta pa nos hiba Aruba den un etapa nobo di progreso caminda cu banda di tur loke mester pa pone Aruba firmemente economicamente riba pia, ta importante tambe pa socialmente nan ta cana paralelo na e nivel di e desaroyo economico y di turismo.” Tabatin hopi keho con hende tabata yega hospital pa ayudo medico y tabata warda te den oranan laat di marduga prome haya tratamento. Famia  di pashent mester a sinta warda riba gang sin mucho privacidad. “Situacionnan cu no tabata bon ni deseabel. Empleado y dokternan ta traha duro, pero sin e facilidad manera debe ser, bo ta haya demotivacion. Si mira kico tur ta construyendo aki cu sigur a haci hopi impresion riba mi ta e parti di e departamento di cuido di emergencia (SEH).



Eman a splica cu na e momentonan aki e departamento di SEH tin 7 camber y esey ta pone cu e tempo pa warda pa wordo yuda ta tarda innecesariamente largo. “Den bo dolor y nerviosismo bo no kier sinta warda oranan largo prome bo wordo yuda. Den e edificio nobo ta amplia e cantidad di camber te yega na 17 camber. Hopi mas profesional y cu mas ekipo y personal cu ta wordo prepara pa traha optimalmente den e departamento aki.”  Actualmente hospital ta trahando duro pa forma enfermeronan specialisa riba diferente tereno, manera neurologia, pa traha riba ICU y Spoedeisende Hulp. Reconstruccion, ampliacion y renobacion di hospital ta un trabou grandi y preliminar na esaki tabatin un vision di calidad.

Aña pasa na momento di groundbreaking Eman a bisa cu semper ora tin critica den situacionnan na momento cu tuma un reto di e indole aki, e ta bay bek den historia y ta ripara cu despues di critica ta bin comprension y despues di comprension ta bin aprecio. Mirando tur esnan cu a yega cerca depsues di e recorido di inspeccion pa saluda Prome Minister Eman y felicit’e cu e bon trabou, por bisa cu e aprecio sigur tey caba.

Expresionnan haci den e articulo aki no necesariamente ta refleha opinion di ArenaPoliti.co