Un biaha mas minister Alex S. a demostra cu e no ta un homber para den su sapato.
Fin di februari 2015 parlamento a urgi e minister pa laga conduci un investigacion cu lo mester aclarea e situacion di e salanan di operacion na hospital, y e minister a priminti di lo a regresa parlamento cu e conclusion despues di dos siman.
Cuatro luna a pasa y e minister porfin ta declara na NoticiaCla cu e motibo cu e reunion no a tuma lugar ainda, ta pasobra e no a haya tur e informacion cu e tabata pidi, ya cu hospital no tabata duna contesta riba preguntanan haci. Den su afan pa busca un "scapegoat", e minister ta menciona den dicho articulo cu e sa kende ta e "culpabelnan", y ta haci cierto insinuacionnan, pero ta demostra atrobe falta di hombresa, y no ta menciona e nombernan di e supuesto "culpabelnan".

Den un articulo anterior nos a cuestiona e forma cu e minister lo kier a conduci e investigacion.
A laga un instancia independiente conduci e investigacion aki, y a acerca tur esnan involucra den e proyecto di renobacion di hospital, of a simplemente laga un compinchi busca informacion cu lo por a confirma e sospecho cu e minister kier trece den publicidad???
Pasobra naturalmente, manera ya nos a trece padilanti, Alex S. tin cu tira culpa riba otro pa tapa su propio fayonan y pa scapa su peyeho. E actonan aki den nos concepto, un actitud asina no ta "pas" pa un gobernante serio. E ta un secreto publico cu e minister aki ta tira culpa riba tur hende, y te hasta ta intimida tur hende cu e unico meta di purba di tapa su propio fracaso y incapacidad di maneha e carteranan cu ta cay bou di su responsabilidad.
E biaha aki ta parce cu e minister kier tira culpa riba e Raad van Bestuur anterior. Y ta menciona cu un di nan ta sinta den e Raad van Bestuur ainda. Esaki ta nifica cu ta sea sr. Boesten of ta dr. Jaime Falconi e kiermeen, pasobra e unico miembro di e Raad van Bestuur cu ainda t'ey ta e director financiero actual sr. de Kool. Aki un biaha mas ta mustra su falta di hombresa di no menciona nomber. Con cobarde mas bo por ta?

Den por lo menos 4 articulo UPP a mustra cu en berdad den principio HUNTO a tuma e decision cu den e proyecto di expansion/renobacion lo no inclui e cambernan di operacion. E motibo pa esaki ta pasobra cu na 2008 a tuma lugar un renobacion di e cambernan di operacion, cu HOH mes a financia.
Nos ta bisa HUNTO, pasobra den un reunion sosteni cu Ministernan Mike E. y otro ministernan, a palabra cu lo NO inclui e cambernan di operacion y alabes cu ora bende e edificio cu SOGA, lo debolbe HOH e 10 miyon florin cu HOH a gasta den e renobacion di e cambernan di operacion. Y esaki NO a wordo haci, al contrario a usa e placa aki pa regala compinchinan.
Y e HUNTO ey kiermeen tambe tur otro "stakeholders", incluyendo esnan cu ta haci uso di e cambernan di operacion.

Un paar di aña despues na 2013, Raad van Bestuur a laga haci un "assessment" general riba e estado di e edificio y e servicio cu ta ser ofreci na HOH, y aki a bin constata cu e cambernan di operacion (RENOBA) ya caba NO ta cumpli cu e rekisitonan moderno cu ta existi e.o. na Hulanda. A la minute e Raad van Bestuur a notifica TUR e stakeholdernan di e situacion cu a presenta. Esaki a sosode na augustus 2013; hopi prome cu a firma cu e grupo mafioso di Miami, na april 2014.

Na mei 2014, un paar di siman despues cu e grupo mafioso di Aruba a firma cu nan counterpart mafioso di Miami, un reunion a ser teni na Miami, na unda a ser duna un presentacion tocante e problema cu a ser constata na augustus 2013 entorno e cambernan di operacion, na TUR e stakeholdernan, tanto na e mafiosi Arubano como na esunnan di Miami y e gerencia di HOH.
A dura exactamente 9 luna cu e grupo mafioso di Miami a bin duna un otro presentacion na e mafiosonan di Aruba y e gerencia di HOH.
Pakiko e minister no a laga conduci un investigacion di con e tardansa pa tuma un decision door di AIB/SOGA/Infrateam!?

Ta di lamenta cu - en bez cu e minister carga su responsabilidad di NO a actua na tempo na un circunstancia cu a presenta su mes, despues cu CONHUNTAMENTE na 2010 a tuma e decision cu e cambernan di operacion lo no forma parti di e proyecto - a bay tira culpa riba otronan.
Si na augustus 2013 a acepta cu TUR e stakeholdernan a haci un "mal-judgement" y door di circunstancia cu a cambia, mester a bin cu ahustacionnan na e proyecto, nos ta convenci cu lo tabata tin comprension.

Den un di nos prome articulonan entorno e proyecto aki, nos a haci mencion cu e grupo frances a mustra caba for di un principio cu e camber di operacion ya caba no ta cumpli cu e rekisitonan actual, y a bisa esaki na esnan involvi. Pero, mirando cu ya caba for di un principio tur cos tabata bisto cu e mafianan di Aruba tin un acuerdo cu e mafiosonan di Miami, no a tuma nan advertencia na serio. Dicon??

Gobernantenan cu no ta asumi nan responsabilidad y actua mesora pa loke nan ta "supposed" di haci ora presenta un cambio den circunstancianan, mester busca otro cos di haci.
Ningun gobernante drechi ta tira culpa riba otro. Si bo no por haci esey, "get out of the kitchen"!! Loke Aruba mester, ta gobernantenan cu ta para pa nan responsabilidadnan, pa nan decisionnan of pa nan "NON-DECISION" tambe. Y nos no mester di gobernantenan cu cada bez ta tira culpa riba otro.

UPP ta spera cu parlamento sigui e "conseho" di e minister manera e a declara na NoticiaCla, y exigi un investigacion den forma di por ehempel un encuesta parlamentario. Nan por dicidi cu nan mes ta yama e protagonistanan y pidi nan cuenta, of ta haci un fraude onderzoek independiente via un instituto forensico, pa wak unda a bay fout cu e presupuesto di e proyecto, pa cu e operatie kamer. Y contrario na loke Minister Alex S. a bisa, esta cu no por haci nada cu esnan responsabel cu no t’ey mas, UPP ta di opinion cu tur esnan responsabel mester ta "accountable" pa nan actonan. Ken cu nan ta!
Sinembargo, UPP ta puntra dicon Alex S. awor ta conseha Parlamento pa tene un encuesta of un investigacion forensico? Dicon su mes no a haci esaki, ya cu " by now" e mester por sa cu e 13 parlamentarionan di AVP sigur lo no bay di acuerdo cu esaki. Sigur awor cu tur hende sa cu su amo Mike E. y otro ministernan, tambe a bay di acuerdo pa NO envolve e cambernan di operacion den e proyecto aki.
Y aki loke un locutor den pasado semper tabata bisa, ta completamente aplicabel; "BE A MAN NOT A CACAROACH"!!


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, juni 14, 2015

Expresionnan haci den e articulo aki no necesariamente ta refleha opinion di ArenaPoliti.co