Tur partido y organisacion mester condena of bira complice!

“E agresion, insulto, menasa, ofensa y kitamento di paz y seguridad personal door di e asina yama Grupo di 7 awemainta contra di Mike Eman, ta otro ehempel di e trend destructivo di e grupo di hende aki. Nos ta condena den e forma mas fuerte posibel e menasa di e grupo aki contra di cualkier ciudadano di nos pais. Tur hende na Aruba, tambe prome minister Mike Eman, tin e pleno derecho di cana y bay unda cu e kier sin mester wordo agredi, menasa, ofendi door di niun hende, den niun forma. Loke a sosode no tin nada di haci cu un opinion politico. Esaki ta un acto terorista di hendenan cu ta uza formanan contra di ley y contra di derechonan basico di cada ser humano pa biba den libertad, trankilidad y cu seguridad personal aki na Aruba. E acto aki, mescos cu otro actonan di agresion y actonan contra di seguridad di nos pais cu e grupo di 7 ta comete, mester wordo condena door di tur hende, tur partido politico, tur organisacion cu kier pa nos tur biba trankilo, na paz y cu seguridad aki na Aruba.” Esaki ta e prome declaracion di e lider di e fraccion di AVP, Rene Herdé, despues di e tende di e acto di agresion diadomingo mainta door di e grupo di hende cu ta yama nan mes “Grupo di 7”.

CONDENA OF BIRA COMPLICE
Rene Herdé a bisa cu tur hende - specialmente tur partido politico - mester condena totalmente e acto di agresion di e grupo aki sin laga niun duda. Esun cu no condena e agresion y disturbio di paz y seguridad aki, ta tolera esaki y ta bira complice di e actonan aki. Esun cu ta complice tambe ta responsabel pa tur loke sosode awor y den futuro aki na Aruba a consecuencia di di actonan manera e grupo aki a haci y a ripiti awor atrobe. Rene Herdé: “No por tin excusa pa no codena loke a sosode como un acto inacceptabel na Aruba. Aki no ta trata di derecho di expresion of di protesta. Aki ta trata di un grupo di hende cu a scohe concientemente pa agredi, ofende, menasa, insulta y kita paz y seguridad di hende na Aruba. E uzo di agresion, menasa, ofensa y insulto no ta acceptabel niun caminda na Aruba. Tur hende na Aruba, tambe e prome minister di nos pais, mester biba cu e pleno seguridad cu e ta liber pa bay unda cu ta, sin e riesgo di wordo agredi, ofendi, insulta y mensa door di niun hende. Ta asina mester ta den e pais cu nos ta biba aden. Pesey tur hende mester condena y actua pa para e agresion aki. Si no par’e awor mes ora, e lo destrui e pais liber y cu seguridad cu nos ta construyendo. Mi ta conta cu tur lider di tur partido politico cu nan lo condena e acto di agresion aki sin laga niun duda. Esun cu no condena e agresion aki, ta tolera esaki y ta bira complice na e agresion contra ciudadanonan di nos pais.”

Expresionnan haci den e articulo aki no necesariamente ta refleha opinion di ArenaPoliti.co