PARA, GRUPO DI 7 y otronan tin cu haci trabou cu MEP mes no tin cara di haci!

E "grupo" cu ta yama su mes PARA ta otro instrumento cu e partido MEP a lanta pa haci trabou cu e partido mes no tin curashi di haci. MEP ta lanta e gruponan aki, dirigi nan y purba saca probecho di loke e gruponan por logra. Ora PUEBLO critica e gruponan aki MEP ta haci comosifuera e no tin nada di haci cu e gruponan. Nos a wak esey sosode cu e grupo di 7. Ora MEP a kere cu e grupo di 7 ta fomenta malcontento den nos pais cu MEP lo por usa pa su metanan partidista, MEP a sostene y aplaudi nan. Ora e grupo di 7 a organisa su marchanan di protesta, e lidernan di MEP a cana dilanti y a wordo elogia y poni riba pedestal door di grupo di 7. Pero ora PUEBLO a lanta contra di e agresion, intimidacion y violencia di e grupo di 7, MEP a core bisa cu nan no tin nada di haci cu e grupo di 7. Awor MEP a lanta e grupo 'PARA'. E meta di PARA lo mester ta pa para e desmantelacion di e refineria y logra habri e refineria. Mescos cu e grupo di 7, MEP ta laga e grupo PARA haci trabou di cr ea un ambiente, pa MEP purba saca probecho didje. Pero mientrastanto PUEBLO ya a saca su conclusion di e forma cu MEP ta traha. Nan kier crea e impresion cu ta ciudadanonan independientemente ta organisa nan mes. Pero e realidad lamentabel ta cu PARA ta un otro instrumento partidista di MEP.

DEBATE
PARA a organisa un asina yama debate riba reapertura di e refineria. Henter e organisacion, te na e persona cu nan a apunta pa guia e debate, tin e signatura di MEP. Esey ta masha lamentabel. Pasobra debatenan riba temanan importante di bida den nos pais ta masha deseabel. E ta essencial pa democrasia. Pero ora e wordo organisa cu metanan partidista, e ta perde tur su balor informativo y democratico. E ta bira un forma pa forsa UN punto di bista di un grupo specifico. E ta pas perfectamente den e forma di traha di MEP. Esta di forsa cosnan cu nan no por logra cu argumento of cu sosten di PUEBLO.

HIPOCRSIA
Un di e cosnan cu tambe PUEBLO a ripara, ta cu MEP y PARA ta usa e mes un argumentonan legitimo cu AVP a usa na 2011 pa habri e refineria cu tabata sera door di maniobranan di MEP. E tempo ey e argumentonan racional di aumento di GDP cu 12%, crecemento di cuponan di trabou bon paga, stimulacion di economia di San Nicolas etc. a wordo presenta door di AVP pa motiva e reapertura di e refineria. E tempo ey caba organisacionnan manera Camara di Comercio a bisa di ta na fabor di un desaroyo diferente y nobo na San Nicolas. Ta cu argumentonan financiero y economico a logra convence hopi hende den comunidad cu ya kier a pone un punto tras di e refineria. Na 2011 henter e partido MEP tabata CONTRA di e reapertura di e refineria. Nan a yama e argumentonan financiero y economico di AVP "coi kens" y nan a vota contra. Awe ta zona straño cu e mes un MEP kier usa e argumentonan di AVP pa motiva reapertura di e refineria cu nan mes a sera y no kier a habri mas. Ta e actitud hipocrita di MEP pa usa e argumentonan cu nan mes a rechasa apenas 4 aña pasa. Awor e grupo PARA ta haci mescos. Ta esaki ta e motibo pakico no por confia MEP y su grupo PARA cu un tema asina importante manera economia di nos pais. OPORTUNISMO Y HIPOCRSIA ta sinonimo di DESCONFIANSA. Pesey Bo no por confia MEP y su instrumentonan partidista.

Expresionnan haci den e articulo aki no necesariamente ta refleha opinion di ArenaPoliti.co