E fin di e siman aki y cuminsamento di otro siman un cantidad limita di studiante lo sali pa Hulanda pa sigui cu nan estudio avansa y p’asina despues, ora cu nan caba cu nan estudio, nan  por bin bek Aruba y yuda contribui na e desaroyo di nos pais. Sinembargo e aña aki e asunto di e becadonan a haya un otro dimension ya cu e biaha aki tin registra apenas 189 studiante cu lo sali pa Hulanda pa sigui cu nan estudio. Siguramente esaki ta algo hopi remarcabel, ya cu segun cifranan disponibel di Departamento di Enseñansa durante  e añanan escolar 2007/2008 te cu 2012/13 semper mas cu 300 studiante a sali for di Aruba pa bay sigui studia na Hulanda. Por ehempel na 2007/2008 tabata tin 344 studiante y na 2012/2013 tabata tin 360 studiante cu a bay Hulanda. Y pa awe nos mira cu ta solamente 189 studiante lo bay e aña aki, esaki siguramente mester ta un preocupacion pa henter comunidad y en especial pa e gobierno actual cu mester tene debido cuenta cu e desaroyo aki.

Coordinadornan sin diploma
Hecho ta cu e gobierno actual di AVP mes no ta dunando bon ehempel na nos studiantenan y te hasta ta demotiva nan pa nan sigui cu un estudio avansa na Hulanda. Hecho ta cu nos studiantenan tambe ta mira con coordinadornan sin ningun diploma y sin preparacion ta haya “trabao” den gobierno, esta pa nan cana solamente tras di Mike Eman den tur bario y tambe locutornan riba payroll ganando 5000, 6000 y te hasta 7000 florin pa luna, siendo cu nan como futuro graduadonan universitario lo mester bay lucha y sacrifica durante 5 of 6 aña na Hulanda pa haya nan diploma y mester keda contento si acaso mes nan logra haya un trabao riba nan isla natal y cu un salario di apenas 3000 of 4000 florin pa luna. E studiantenan aki tambe ta mira con e gobierno di AVP ta emplea pensionadonan di 74 aña bay ariba cu un salario barbaro di riba 11 y 12 mil florin pa luna y asina ta stroba nan como hoben di haya e funcionnan aki . Tambe un politico riba lista di AVP cu a haya un studieopdracht y hunto cu esaki un trabao na Arubahuis, esta estilo di cumpra un y haya dos. Y asina por sigui cu mas ehempel di tur e bagamunderianan aki di AVP.

E solo lo briya atrobe
Tur esaki ta parti di e maneho descabeya y di abuso di Mike Eman y su ministronan cu ta birando un demotivacion pa nos studiantenan sigui cu nan estudio avansa. Studiantenan cu ta puntra nan mes, pakico nan tin cu bay studia asina tanto aña na Hulanda y pa mira coordinadornan ta wordo premia y recompensa cu un “trabao” basa riba nan “AVP diploma”?
Sinembargo partido MEP si kier a motiva nos studiantenan pa nan no laga e actonan bochornoso y bergonsoso aki di Gabinete Mike Eman demotiva nan, pero cu nan mester haci tur nan esfuerso pa toch sigui cu nan estudio avansa, ya cu despues di cada tempestad, e solo lo briya atrobe riba e pais aki. Tene semper e bista fiha riba e hecho cu ningun dictadura lo dura mil aña y cu den futuro tur graduado lo wordo trata cu dignidad atrobe y esey ora cu pueblo core cu e gobernantenan inhusto y di malhempel aki.

Expresionnan haci den e articulo aki no necesariamente ta refleha opinion di ArenaPoliti.co