Atrobe nos por mira cu Raad van Advies, como colegio independiente, a bin ta demostra "weso di lomba" cu su evaluacion y conseho al caso riba e concepto di ley “Aruba Financieel Toezicht”. Den pasado eroneamente a hinca e instituto aki den un luz negativo na momento cu a trata na desacredita consehonan rond di tanto Presupuesto 2014 como e presupuesto cu a wordo cambia na final di 2014.

Particularmente den comunicadonan di UPP di 23 y 27 di october 2014 nos a mustra cu apesar di tur inconveniencianan, manera scarsedad di personal cualifica y un budget limita, Raad van Advies (RvA) y Algemene Rekenkamer Aruba (ARA) toch a percura pa asesora e Parlamento di Aruba cu conseho y tambe criticanan al caso. Pero manera expone den e rapport di e Wetenschappelijk Onderzoek- en Documentatiecentrum (WODC) na 2011, ta importante pa no hinca ni RvA ni ARA den e discusion ni polarisacion politico existente na Aruba.

Nan mester haña e oportunidad pa por eherce nan trabou den tur obhetividad, loke no ta facil riba un isla chikito manera Aruba. Un ehempel bibo cu e advertencia di WODC tabata na su lugar, ta wordo demostra door di e forma con politiconan, parlamentarionan y gobierno a haña necesario pa fomenta polarisacion, disgusto y hasta rabia riba e instituto RvA y su miembronan, despues cu esaki a publica den dos ocasion nan investigacion di e presupuesto 2014 na mei y october 2014.

E tempo ey e partido na mando, tanto na nivel di gobierno como di parlamento a haya ta bon pa desacredita y ignora e resultado di e conseho cu Raad van Advies a duna a base di presupuesto 2014, manera entrega dor di ex-minister Juan David Y. UPP e tempo ey a bisa cu “historia lo demostra cu ta Raad van Advies tabata e prome instancia cu a bati alarma y alerta ”e.o. Parlamento pa no acepta e presupuesto aki y mande bek pa un revision mas extenso". Mientras cu partidonan politico den oposicion a para tras di e conseho aki. Nos tur sa kico a sosode despues ora cu Gobernador no a firma e presupuesto, y cu despues Raad van Advies atrobe a bay na trata e presupuesto adapta basa riba conseho di Cft. Den e mesun advies aki Raad van Advies a haya necesario pa expone su pensamento tocante legitimidad di e KB imponi door di Hulanda, unda nan a conclui cu Rijksministerraad no a actua segun reglanan stipula den nos Statuut. E tempo ey e documento aki a wordo ricibi cu yen di criticanan door di esnan cu tabata cuestiona e maneho di e gobierno, mientras cu na e momento ey si partido na mando no a perde pa gana y a elogia y expresa nan satisfaccion cu e trabou y conseho di Raad van Advies. E mesun Raad van Advies cu ainda na mei a wordo severamente ataca dor di nan, mirando e conseho procesa.

E tempo ey UPP a vocifera cu nos lo por bay discuti si tabata competencia di Raad van Advies pa expresa un opinion riba e tema di legitimidad di e KB den e concepto di ley pa adaptacion di presupuesto 2014, “pero cu loke no por wordo permiti ta cu ta cuestiona e credibilidad di e integrantenan di e Organo Consultativo, cu e unico meta pa silencia e mensahe exponi” (“kill the messenger and you will kill the message”).

UPP e tempo ey tambe a trece padilanti cu Raad van Advies, banda di para keto riba e aspecto huridico di KB, a completa e tarea manera pidi door di Gobernador. Y den un forma hopi cla Raad van Advies a laga sa atrobe cu Parlamento di Aruba a faya barbaramente pa aproba e presupuesto ficticio 2014, mientras cu e investigacion di Cft a comproba e ponencia di Raad van Advies cu Aruba ta den rumbo di un desaster financiero door di manipulacion cu cifranan di parti di gobierno. Nos a pidi e tempo ey pa no para mucho keto riba e parti huridico di e legalidad di e KB, sino cu mester keda cu e atencion riba nos situacion financiero desastroso y alarmante.

Sin bay den detaye ainda riba su ultimo conseho riba e protocol di 2 di mei 2015, nos mester constata cu na e momentonan aki Raad van Advies a demostra, apesar di tur e inconveniencianan, di por a produci un otro conseho cu merece tur elogio. E biaha aki cu satisfaccion UPP por constata cu tin practicamente un unanimidad den esaki, mirando cu tanto gobierno como Parlamento, parce di ta tene na consideracion e conseho aki. E unico cos ta cu cada uno, esta e partido di gobernacion, su parlamentarionan y e gobierno, ta duna un interpretacion, y esnan di oposicion ta wak e di otro manera.

E conseho aki di RvA ta uno sumamente destructivo pa e concepto di ley presenta, y tambe ta duna muestra cu tanto gobierno como parlamento a faya atrobe barbaramente. E miembronan di Parlamento cu ta sostene gobierno, no a tuma un postura mas fuerte pa hala atencion di gobierno cu e no por sera acuerdonan, manera e protocol firma 2 di mei 2015, riba lomba di Parlamento y mas ainda entregando e autonomia di Aruba y e autoridadnan di Parlamento den man di Gobierno di Hulanda. Cu e conseho aki di Raad van Advies, nos por bisa cu tanto Mike E. como Angel B., óf a faya barbaramente firmando e protocol, óf no ta importa nan un bledo kico ta pasa cu nos autonomia, pero tin como unico meta con por tene Gobierno Hulandes content mas tanto posibel

Cu e conseho duna aki, UPP ta kere cu si Mike E. ta respeta su mes, e lo mester a tene honor na su mes, y retira su gobierno. E ultimo aki ta haci tambe cu nos pregunta ta, cu si di berdad e “supuesto balor” cu ta wordo duna na e conseho aki dor di partido na mando, ta uno sincero.

Ta tempo pa nos Pueblo realisa, cu loke nos tin aki, ta un set di bende - patria, cu e unico cos cu nan ta buscando, ta trata na enrikese nan mes mas tanto cu ta posibel, sin importa cuanto e Pueblo mes mester sangra.


Den nomber di Union Patriotico Progresista – U.P.P.
Candelario A. S. D. Wever
Brazil, juli 29, 2015.

Expresionnan haci den e articulo aki no necesariamente ta refleha opinion di ArenaPoliti.co