ORANJESTAD – Como e mandatario encarga den gran parti cu e trabou di rescate y restauracion di nos monumentonan historico, Minister di Infrastructura Benny Sevinger a atende dialuna ultimo e ceremonia di apertura di edificio Zoutmanstraat #1. Loke antes a fungi como e prome oficina di Censo na Aruba, entre varios otro funcion den transcurso di un siglo, awo ta destina pa bira sede di artesania 100% Arubiano.

Minister Sevinger a expresa den su turno na palabra cu e proyecto aki ta uno cu a rekeri hopi esfuerso, pero awo ta bay brinda hopi satisfaccion na e generacionnan actual y den futuro. E trabou di rescate di un monumento ta mas dificil di loke ta pensa. “Hopi hende ta kere cu restauracion di un edificio monumental ta un cos facil, al contrario, e ta dificil y ta tuma su tempo. Hopi hende a participa den su restauracion y a duna nan granito, hopi departamento tambe pa nos por a yega asina leu. E trabou a dura mas cu un aña,” Minister a bisa.

Sevinger a expresa e satisfaccion pa e resultado y e confianza cu e tin den e funcion cu su colega di Cultura ta bay dun’e: “E edificio a keda un joya y nos no tin duda cu loke Minister Otmar Oduber ta bay haci cu ne ta haya un dimension extra pa pueblo di Aruba caminda nos artesanonan por mustra productonan traha netamente na Aruba. Esaki ta bay bira un di e edificionan monumental mas famoso na Aruba.”

Zoutmanstraat #1 ta forma parti di e Centro Historico di Aruba den Oranjestad. Rond di dje tin varios otro monumento cu ya ta restaura of ta den proceso. Adicionalmente, tur ta wordo conecta cu e construccion di Plasa Padu pa asina duna realce na e historia y tambe cultura di nos isla. “Nos lo tin un accento pa e nucleo historico di nos pais y unda nos por conta e historia na nos bishitantenan y nos yiunan di kico e edificionan aki ta nifica pa nos pais,” e titular di infrastructura a indica.

Den e caso di e edificio en cuestion, e ta bay permiti hendenan conoce e historia di Aruba durante siglo 20, mientras cu den siglo 21 ta bay ilustra e cultura, herencia y talento artistico di nos hendenan. Minister Sevinger a finalisa expresando su pabien na pueblo di Aruba, pabien na artesano y artistanan y pabien na Minister Oduber. Tambe a gradici tur esnan envolvi den e proyecto y su exitoso ehecucion, manera  Monumentenfonds, Monumentenbureau, arkitecto Jouel Croes y compania di construccion Van den Broek.

Expresionnan haci den e articulo aki no necesariamente ta refleha opinion di ArenaPoliti.co