For di un principio UPP a duna di conoce di tin sentimentonan mixto respecto e No-firmamento di e presupuesto y e KB cu despues e Gobierno di Reino a impone riba pais Aruba.

Alabes nos a alerta nos pueblo pa NO bay laga Gobierno di Aruba desvia e atencion riba e problema real di Aruba cu ta e situacion financiero deplorabel.

Sinembargo yuda door di medionan di comunicacion comprometi, e Gobierno Machiavellico aki a sigui cu su practica di malinforma nos pueblo. Tur integrante di e partido na mando a sera cabes y a cuminsa cu atakenan personal contra opositornan politico, alabes te hasta contra e representante di nos Rey, esta nos Gobernador, y haci comosifuera Aruba no tin problema, y cu nos por tin un futuro briyante nos dilanti SI GOBERNADOR FIRMA E PRESUPUESTO 2014 PA CABA.

Na principio nos a mira un Prome Ministro ta bay den welga di hamber pasobra Hulanda lo ta mete den asuntonan interno di nos pais. Y kiko nos a bin haya sa, cu ta mesun Ministro Presidente den un "onderonsje" cu Rutte y Plasterk a firma un acuerdo pa laga CFT bin haci un investigacion riba e situacion di nos finanzas publico.Ora cu su welga di hamber no a duna e resultado cu ela spera y ora cu Hulanda a declara den 2de Kamer cu nan tin grabacion con Mike E. mes a bay di acuerdo cu CFT lo bay haci e investigacion, Mike E. a stop cu su presunto welga di hamber. Pero full e presunto welga di hamber aki y cu tur e show rond di esaki, a socede solamente pa trata di sconde e realidad di nos situacion financiero pa e pueblo Arubano. Ora cu otro tabata discuti riba cartanan cu lo a bay y bin entre JDY y Plasterk, UPP como prome a mustra riba e acuerdo di dia 3 di juli 2014, y a mustra riba e hecho cu Mike E. y su ministronan lo no tin nada ni di kita ni di pone, pasobra den e acuerdo di dia 3 di juli, ta poni cla y raspa cu gobierno MESTER tuma TUR e recomendacionnan cu CFT trece padilanti.

Despues cu CFT a keda cla cu su investigacion, na unda a describi na un manera cla e situacion financiero alarmante y deplorabel, ata Minister Angel B. kier a bin purba di desvia atencion tambe door di tilda Plasterk como un mentiroso y tambe bin papia tocante un presupuesto supletorio, siendo cu esey no por ta ya cu e presupuesto 2014 no a ser firma, ni tampoco a ser publica, consequentemente no tin forza di ley. Aki un biaha mas ta UPP a trece esaki padilanti como primicia. Y nos a bisa tambe cu tur a maniobranan aki ta pa desvia atencion di e realidad amargo di nos situacion financiero y e medidanan cu lo mester wordo imponi riba nos pueblo.

Ora nos a kere cu porfin e gobierno lo ta sincero cu e pueblo, ata CONTRA tur etica, ta publica e conseho di Raad van Advies, prome cu esaki a bay Parlamento. E conseho consultativo a publica cu den nan concepto e KB impone door di e Gobierno di Reino, no tin legitimidad y cu e gobernador mester firma bij "het kruisje"! Mike E. tabata di hubilo, pero atrobe a "lubida" di lesa e resto di e rapport cu ta enfoca riba un presupuesto deficiente y irealistico cu su gobierno a entrega na gobernador. Y e makinaria di propaganda a la GOEBELS, a cuminza draai. Esaki atrobe pa desvia atencion. Aki un biaha mas ta UPP for di principio a sali na defensa di un di nos "waarborginstitutienan" (RvA), y UPP un biaha mas a haci un apelacion pa stop cu e polarizacion. E polarizacion aki lo yuda solamente Mike E. pa sigui manipula cu informacion. Nos ta contento cu al final tin mas partidonan politico a mira cu loke tabata socede, no ta na su lugar y cu nos mester sali na vanguardia di nos "Waarborginstituties", aunque cu nos por tin diferencia di opinion riba nan conseho.

Diamars dia 4 di november 2014 e drama politico pa partido AVP y su gobernantenan a bolbe haña un sla duro ora cu pueblo di Aruba por a tuma nota di e contesta cu minister Plasterk a presenta na miembronan di 2de Kamer riba preguntanan di Bosman. Na un manera profesional y directo ela contesta e preguntanan, y aki nos por a ripara cu su contestanan ta bay linea recta contra esun di Raad van Advies di Aruba. Nos ta spera cu awor NO start atrobe un discusion academico riba si e KB ta legal si of no. Den e contestacion Plasterk a enfatisa cu loke a purba di haci ta, cumpli cu tarea di gobierno di Reino, cu entre otro ta su "WAARBORGFUNCTIE". Y aki, sin cu e ta bise cu tanto palabranan, e ta referi na e situacion financiero deplorabel di Aruba. Cu otro palabra, nos no mester sigui cu e discusion academico aki, pero ban focus riba e situacion financiero di nos pais. Y hustamente ta esaki UPP kier a mustra for di un principio.

No ban permiti pa nos atencion sigui wordo desvia. Nos no mag di perde ni un minuut mas riba legitimidad di e KB of no, pero ban enfoca con pa scapa ainda kiko por ser scapa. Y si mester bin medida, ban percura pa mara mannan di e politico, pa nunca mas ningun politico of partido politico destrui nos pais manera Mike E. y su secuasnan ta haciendo cu nos pais. Y tambe e medidanan aki no por ser pasa tanten cu NO baha gastonan innecesario y para TUR proyectonan corupto y sin destaho publico, cu ta sirbi solamente pa sigui yena saco di e financistanan di e campaña di AVP: TA E PUEBLO SO POR SCAPA E PUEBLO.

Den nomber di Union Patriotico Progresista – U.P.P.
Candelario – Booshi – Wever
Brazil, november 4, 2014

Expresionnan haci den e articulo aki no necesariamente ta refleha opinion di ArenaPoliti.co