Den e ultimo dianan aki turismo ta e topico di dia. Diferente hende ta comentando tocante turismo su importancia na e economia di Aruba. Hasta por a tuma nota cu a wordo expresa cu ta turismo ta cargando Aruba su economia, manera cos cu ta diripiente awor esaki ta e caso.
Si wak datonan riba e area di turismo durante tempo por calcula cu desde 1986 caba industria di turismo su aporte na e economia di Aruba tawata rond di 39.0%. Den e tabel adhunto por tuma nota di e GDP di Aruba (economia) pero tambe locual Aruba ta ricibi na entrada di turismo registra pa Banco Central di Aruba.  Ainda no tin un forma mas detaya of specifico na Aruba pa calcula turismo su efecto, pues por uza esaki como un indicador. Un industria cu Aruba a perde ta e refineria cu den su existencia tawata aporta 12% pa 13% na economia di Aruba.
Na aña 2014 e aporte di entradanan di turismo na e economia di Aruba tawata casi 60.0% mientras cu na final di añanan 2000 e porcentahe aki no tawata yega ni 50%. Por tuma nota tambe cu Aruba su record di GDP tawata na aña 2008 cu ta un aña prome cu e recesion economico mundial.
Un otro indicador cu  por uza ta e entrada di turismo y dividi esaki den e cantidad di anochi cu e bishitantenan ta keda Aruba pa asina yega na un calculacion cuanto entrada Aruba ta ricibi di turismo pa anochi. Por nota e ora cu atrobe na aña 2008 tawata e aña cu Aruba a ricibi mas tanto entrada pa anochi di turismo, cual tawata 385 florin pa anochi. Na 2014 esaki ta 370 florin pa anochi. Apesar cu awendia Aruba ta ricibi mas cantidad di bishitante toch no por bisa Aruba ta ricibi mas na entrada pa anochi di turismo. Mas ainda, si nos tuma nota cu awendia tin hopi mas placa cu antes pa promove nos isla turisticamente por bisa e ora cu porta ta duna mas atencion na cantidad di bishitante mientras cu Aruba ta atraendo menos bishitante cu ta dispuesto of por gasta mas placa durante nan estadia na Aruba.
Mirando cu Aruba su economia ta depende grandemente riba e industria di turismo, esaki NO necesariamente ta algo bon of algo pa broma cun'e. Mas bien e ta un señal con dependiente y vulnerabel Aruba ta birando dependiendo mas y mas di un solo pilar economico, TURISMO!

Expresionnan haci den e articulo aki no necesariamente ta refleha opinion di ArenaPoliti.co