Siguiente fase ta enfoca riba e dedicatoria na Lampe 

ORANJESTAD – Gabinete Mike Eman hunto cu Departamento di Obranan Publico y contratista Arubaanse Wegenbouw Maatschappij ta contento di informa cu e prome fase di e proyecto pa construccion di Plaza Padu a keda finalisa. Un bes cu e proceso di destaho y pre-construccion keda cla, ta pasa inmediatamente over pa e di dos fase cual ta cubri e di dos mita di e area patras di Oficina di Gobierno y Parlamento. E ultimo aki ta esun caminda ta ubica e monumento dedica na nos gran Padu del Caribe.

E plan ta forma parti di e Gobierno aki su esfuerso pa rescata nos monumentonan historico y resalta e atractivo historico di centro di ciudad. Manera a yega di splica anteriormente, e intencion ta pa crea e Centro di Gobernacion cu na mesun momento ta bira un Plasa Monumental pa Oranjestad. Gobierno a dicidi di honra e e bida y logronan di Sr. Juan Chabaya Lampe cu un luga special na e punto aki.

Centro di Gobernacion paso e area ta reuni edificionan di Conseho di Minister cu e imponente edificio Cocolishi, Parlamento di Aruba y Oficina di Gobernador ademas di Censo y Registro Civil, Contraloria General y mas recientemente, e monumento na Zoutmanstraat #1 cu ta destina como sede pa artesania local. No por laga afo Museo Historico/Willem III Toren/Fort Zoutman cu ta pega tambe.

Diseña pa e yiu di tera, ir. Raffy Kock, Plaza Padu ta traha cu pavers, mata y bankinan pa ofrece un plaza caminda peatonnan por admira tur loke tin rond, pero tambe e espacio habri riba su mes. Si mira e trabounan haci te awo, ta haya un idea di kico ta e plasa su estilo. E siguiente parti di e proyecto ta inclui mas di e elementonan cu ta refleha na ken e plasa ta dedica.

Tin hopi cos cu ta hunga un papel den e proceso pa ehecucion di un proyecto asina, pero no ta descarta cu Plaza Padu lo ta cla prome cu fin di 2015. Combersacionnan personal cu Sr. Lampe tambe a forma parti di e inspiracion di e ingeniero Kock ora di realisa su diseño. Esaki tabata un proceso di investigacion pa conoce di cerca henter e historia y tur e talento y logronan di e Arubiano cu ta un leyenda bibo.

Expresionnan haci den e articulo aki no necesariamente ta refleha opinion di ArenaPoliti.co