Evelyn Wever-Croes (MEP): Otro eror di minister Michelle Hooijboer. Forsa studiantenan den 2de MAVO scohe pakket ta iresponsabel
ORANJESTAD – Lider di MEP Evelyn Wever-Croes den Conferencia di Prensa di MEP a lansa critica serio riba e decision di Minister Michelle Hooijboer-Winklaar di ensenjansa pa cambia e sistema di scohe pakket den MAVO. Te cu anja pasa un studiante di MAVO mester a scohe su pakket den e di 3 anja, cu tabata Ciclo Avansa 1. Esey caba tabata tin su preocupacionnan pasobra tin studiante di 14 anja cu mester dicidi e ora kiko nan kier bira. Pero dia 2 di juli minister Hooijboer a dicidi di cambia tur cos, sin informa e scolnan debidamente.
E cambio aki ta poni den un landsbesluit houdende algemene maatregelen, AB 2015 no. 28, un ley cu no mester pasa Parlamento. Eyden a cambia e sistema y ta pone cu studiantenan awor den di dos anja, Ciclo Basico 2, caba mester scohe nan pakket.
E alumnonan di Ciclo Basico 2 no a haya cierto di e materianan mes ainda. Por ehempel den MAVO 2 e materia yama ASW y den MAVO 3 e ta cambia bira Aardrijkskunde y Geschiedenis. Pero ya den di dos anja caba e studiante mester scohe si e kier Aardrijkskunde of Geschiedenis den su pakket, sin siquiera a haya e materianan ey den su bida! Mescos pa e materia N&T, cu apenas den MAVO 3 ta bira Natuurkunde y Scheikunde, pero ya desde MAVO 2 e studiante mester scohe si e kier un di e materianan ey sin nunca a haya e les mes den e materianan ey.
E decision pa forsa studiantenan scohe nan pakket den di dos anja ta hopi iresponsabel, y pa colmo no a wordo splica manera mester ta na e scolnan.
Minister Michelle Hooijboer lo wordo yama den Parlamento pa duna cuenta di tur e erornan cu e ta cometiendo den ensenjansa, cu ta bayendo di mal en peor.
Expresionnan haci den e articulo aki no necesariamente ta refleha opinion di ArenaPoliti.co