Medidanan pa aumenta entradanan di gobierno:

Den un serie di articulo cu lo sali den e dianan nos dilanti, partido MEP kier a informa comunidad di e pakete di 24 medidanan cu ta na caminda y cu lo afecta un y tur den nos comunidad. MEP como un partido social democrata ta considera como su deber civico y moral pa duna tur informacion al respecto, ya cu na momento cu e medidanan aki ser implementa, esakinan no cay como sorpresa den nos comunidad.

Articulo 14 di ley CAFT
Durante e reunion di Parlamento di dia 27 di augustus ultimo tratando e ley di CAFT henter fraccion di AVP y tambe Minister President Mike Eman sin ningun tiki di berguensa a desmenti y nenga rotundamente cu e ley aki – fuera di ta un entrega di nos autonomia financiero na Hulanda - ta encera medidanan cu mester ser tuma contra pueblo y cu lo bay corta te den weso di cada ciudadano. Por cierto e medidanan ta consecuencia di e maneho descabeya di malgastamento di placa sin fin durante henter e periodo di 2010-2015 di Gabinete Mike Eman. Sinembargo na momento cu analisa e ley di CAFT por comproba cu den articulo 14 di e ley aki implicitamente por destila cu e medidanan cruel mester ser tuma p’asina cera e buraco den e presupuestonan di mas aña di e gobierno actual. Mester enfatisa cu den inciso 2  di articulo 14 di e ley ta para lo siguiente: ”Voor het Land Aruba bedraagt het tekort voor het begrotingsjaar maximaal 3.7% van het BBP, in 2016 maximaal 2%, in 2017 0.5%, met in 2018 een overschot  van minimaal 0.5%”. Alavez esaki ta ser confirma den e Memorie van Toelichting cu ta papia di “wenselijke minimale financieringsoverschot” y “maximale hoogte van het financieringstekort”, cu ta ser indica den e presupuestonan di 2014 y 2015. Tur hende sa caba cu na 2014 e deficit financiero a yega na un record di 9.3%, pues den un solo aña esaki mester ser reduci te cu 3.7%  na 2015.

Instrumentonan pa aumenta entrada
Hecho ta cu pa logra e reduccion aki Gabinete Eman lo mester tuma 24 medida drastico cu nan mes a propone na Hulanda y CFT, cual ta significa cu den e añanan 2015 te cu 2018 mester tuma medidanan drastico pa aumenta e entradanan di gobierno, esta na 2015: 81.4 miyon, na 2016: 130 miyon, na 2017: 153.5 miyon y na 2018: 170 miyon. Pa logra esaki Gabinete Eman lo bay aplica e siguiente dos instrumentonan: 1. Riba lomba di pueblo nan lo intensifica ferozmente e cobramento di belastingnan atrasa (loonbelasting, winstbelasting, grondbelasting y BBO). Hecho ta cu e medida aki por ser sinti caba cerca entre otro nos pensionadonan kendenan ultimamente ta ser suta cu pago di belastingnan cu pa hopi aña caba ya a vence y tambe doñonan di cas ta wordo cobra grondbelasting den forma rigido. Alavez – prome cu aprobacion di e ley CAFT - e BBO a ser aumenta caba mediante introduccion di e BAZV (Health Tax).

2. Entrante Januari 2016 gobierno di AVP lo bay introduci un reforma fiscal, caminda nan lo suta pueblo cu un tipo di belasting nobo, esta un Algemene Bestedingsbelasting (ABB) y cu gran probabilidad esaki lo bay ta entre 8 pa 12% y consecuentemente costo di bida lo sigui subi. Tur esaki pa Gabinete Eman haya entradanan extra cu nan por sigui malgasta na nan antoho.

Entradanan ta kedando atras
Sinembargo mester trece padilanti cu e ehercicio di haya extra entrada den e prome 6 lunanan di 2015 no ta dunando ningun resultado ya cu den e promer mita di aña 2015 e entradanan tabata 540.9 miyon florin y compara cu e prome mita di 2014 (544.9 miyon florin), esaki ta 4 miyon menos na entrada! Esaki ta ser confirma tambe den e rapport di CFT di 4 juni 2015, caminda nan ta bisa cu den 2015 solamente 61.3 miyon di e total di 81.4 miyon por ser cobra di e belastingnan atrasa.
Aki claramente por conclui cu “van een kale kip kan men geen veren plukken”, esta cu pueblo no tin espacio financiero mas pa sigui paga extra belasting na gobierno. Pero no mester lubida alavez cu e gobierno aki a exonera varios familiar y compinchi politico di pagonan atrasa di belasting y cual siguramente tambe a impedi pa gobierno haya mas placa den su caha.
Den e siguiente dianan partido MEP lo bay elabora riba e demas medidanan cu ta na caminda y cu lo afecta tur ciudadano den e pais aki.

Expresionnan haci den e articulo aki no necesariamente ta refleha opinion di ArenaPoliti.co