33 hende di AVP so a bin pa sostene AVP den manifestación 

Mike Eman ta perdiendo tur sosten. Ya e no tin sosten mas di gremionan, ni di sindicatonan y tampoco di pueblo. Esey a keda demostra e ultimo dianan aki. Pasobra pa diahuebs, cu e reunion di entrega di autonomia a wordo trata den Parlamento, Mike Eman 'himself' a yama su hendenan y duna nan opdracht pa bay Parlamento. Berdad algun di nan hendenan a bin, pero nada compara cu 33 mil votador. Ta apenas 33 votador tabata tey.
Pa dialuna Mike Eman 'himself' a manda un email pa tur su votadornan pa bay sostene den drecha e daño haci na e edificio di Parlamento, atrobe apenas 33 persona a aparece, y ta solamente esnan cu ta wordo paga pa gobierno.
Pesey mes e doñonan di AVP den reunion a puntra nan mes "ta unda e AVP-ista del alma ta?", y den nan mesun palabra "acaso tur a bira materialista?"
Mike Eman semper a sconde su mes tras di dialogo social, pero awor ta mira cu ningun gremio ni sindicato ta sosten’e den e ley di CAFT di entrega di autonomia, y principalmente pasobra Mike Eman mes a bira lomba pa pueblo. Mike Eman a bira arogante y no kier splica pueblo kico e ley ta contene berdaderamente, Mike Eman ta prefera di sigui cu manipulacion.
Ta un hilaridad cu awor, despues cu e ley a pasa, e ta core sinta cu gremionan y sindicatonan. Awor ta laat! Kico bo kier bisa nan awor cu e ley a pasa caba? Pueblo mester cuminsa hala faha mara pa e medidanan na caminda, pasobra manera tur cos ta pinta, Mike Eman mes lo no hala faha mara di gastonan di su gobierno, pero ta pone pueblo hala faha mara.

Expresionnan haci den e articulo aki no necesariamente ta refleha opinion di ArenaPoliti.co