Parkeermeters lo keda introduci otro siman 

Instalacion di parkeermeters no ta un decision nobo. De facto e ta un decision cu den pasado tambe lo a keda di ehecuta pero e diferencia ta cu e Gobierno actual a percura pa un compania estatal, den e caso aki Arubus ta esun cu ta opera e parkeermeters bou di Aruparking. Esaki lo nifica tambe cu lo por continua cu e subsidionan di Arubus.

Arubus ta un di e poco companianan di transporte publico den Reino Hulandes cu no ta cobra e pensionadonan pa transportacion y kier mantene esaki asina. E studiantenan y deportistanan tambe ta haya un tarifa sumamente reduci di 1.25 florin. Sin embargo e costo pa transporte publico pa cada pasahero den realidad ta e suma di 5.70 florin. Na october e tarifa lo conoce un cambio y lo bira 3 florin. Cu esaki ainda tin un gran parti di e tarifanan cu Arubus mes mester absorba.

Minister Otmar Oduber tabata presente na un presentacion di e parkeermeters den nos centro di ciudad. E mandatario ta comenta cu e decision di laga Arubus maneha Aruparking, lo nifica cu e compania lo por haya un entrada adicional cu lo conduci cu poco poco por disminui e subsidio di Gobierno di Aruba. Sr. Oduber ta bisa: "Esaki na un dado momento por nifica cu Arubus lo por bira completamente independiente. Algo hopi ambicioso mirando cu tur parti di mundo transporte publico ta keda subsidia."

Otro siman ta introduci e meternan di parkeer. Minister Oduber ta comenta: "Nos sa cu esaki ta algo cu tur hende lo mester bay custuma cu ne. E ta algo nobo pa Aruba pero internacionalmente parkeermeters ta e tendencia pa mehora participacion comercial den centro di ciudad pa esunnan cu kier yega na e tiendanan." E mandatario ta sigui bisa: "Nos ta consciente cu cambio no ta facil, pero a lo largo tur hende lo disfruta di e beneficionan di e parkeermeters"

Minister ta sigui splica cu ta creando mas espacio di stacionamento di auto den centro di ciudad pa brinda e oportunidad pa tur cu mester un luga sigur pa staciona nan vehiculo. Sr. Oduber ta bisa: "Pesey a scoge tambe mas di 400 hoki adicional tur rond den centro di ciudad pa crea espacionan adicional pa por yuda sostene e demanda pa staciona auto den Oranjestad. E lo regula stacionamento den centro di ciudad unda lo evita autonan para riba acera unda peaton lo mester baha riba caminda pa por pasa, e lo evita un cantidad grandi di incidente y tambe accidente. Autonan cu ta haya raspa of ta perde spiel den avenidanan smal tur esaki lo pasa pa pasado."

Lo tin un campaña grandi di conscientisacion cu lo inicia e siman aki via medionan di comunicacion. Ta pidi comunidad di Aruba pa informa su mes debidamente riba esaki.

Expresionnan haci den e articulo aki no necesariamente ta refleha opinion di ArenaPoliti.co