EVELYN WEVER-CROES TA INVITA TUR HENDE PA ACUDI NA PARLAMENTO DIAHUEBS AWOR 

ORANJESTAD – E ley di CAFT ta poni pa wordo trata den Parlamento diahuebs awor 27 augustus. Pueblo di Aruba ta wordo invita pa acudi na Parlamento e dia aki, den cuadro di accion AWOR T’E ORA cu lider di MEP a yama dialuna mainta.

“Awor t’e ora cu abo mester lanta y bringa pa bienestar di bo yiunan y nan yiunan. Awor t’e ora cu bo mester bisa Mike Eman y su gabinete cu ta basta di tanto medida contra pueblo. Awor t’e ora cu abo mester puntra Mike Eman ki dia e ta cuminsa hala su faha mara, en bes di masacra e pueblo aki di e forma aki. Awor t’e ora cu bo mester confronta e gobierno y bisa nan pa tene honor na nan mes y entrega nan retiro, pasobra nan a faya.

Cu e ley di CAFT Mike Eman ta entrega nos autonomía financiero na Hulanda, un autonomía cu nos pueblo a lucha duro pa haya, y cu a trese hopi bienestar pa nos pueblo. Mike Eman no tin ningún derecho di entrega e lucha aki. Pesey awor t’e ora.

E siman aki nos lo tene varios reunion di contacto pa informa pueblo, e prome ta mayan diamars na Paradera, rotonde di Yaburibari sigi bai ariba, na bo man robes. Nos lo sigi comparti informacion y presenta prueba dicon Gabinete Mike Eman no por soluciona e crisis financiero c unan a hinca nos aden. Tambe lo tin programanan via televisión y radio. Finalmente mi kier invita tur hende pa tey presente na Parlamento diahuebs awor, pasobra ta solamente si Mike Eman y su ministernan sinti e rosea cayente di nos pueblo, algo por cambia”, líder di MEP a finalisa, bisando tur hende pa keda pendiente di mas detalles di e accion AWOR T’E ORA.

Expresionnan haci den e articulo aki no necesariamente ta refleha opinion di ArenaPoliti.co