Minister Otmar Oduber por a tuma nota di un publicacion relaciona cu e keho cu Sra. Evelyn Wever-Croes (fraccion di MEP) a entrega na Ministerio Publico contra Presidente di Parlamento Sra. Marisol Lopez-Tromp. E mandatario ta haya cu esaki ta un hilaridad, cu e ta un tumamento di haci di institutonan serio manera Ministerio Publico, aunke no ta prome biaha cu partido MEP ta usa Ministerio Publico cu metanan politico.
E minister ta bisa cu posiblemente susto ta drentando esnan di partido MEP mirando cu tur e grabacionnan di e camaranan rond di Parlamento ta den man di Ministerio Publico y otro instancianan.
Den e declaracion en cuestion por lesa entre otro cu Minister di Turismo tabatin seguridad den e edificio caminda no tabatin permiso pa esaki. “Na ningun momento so tabatin beveiliging di ministernan den gebouw, nos beveiliging ta den man di Presidente di Parlamento. Presidente di Parlamento ta encarga cuerpo di CEA como tambe Cuerpo Policial, pasobra na momento cu Ministernan ta den Parlamento nos seguridad ta den man di Presidente di Parlamento. Mi ta gradici y felicita Cuerpo Policial pa e tremendo trabou cu nan a haci, mescos cu CEA. Esaki a pesar cu tabata planifica hopi cos for di paden mes”, Minister Oduber ta declara.
E ta bisa tambe cu por a mira miembronan di fraccion di MEP durante henter e disturbio cu a tuma lugar drenta y bay pafo, kita bachi, lora manga, para cu e grupo di hende, bay paden bek. Tambe foi paden tabata yama pafo pa bisa ki ora mester actua, ki ora mester move y awor ta bin bisa cu tabatin hendenan arma den Parlamento, cual na ningun momento tabata e caso, fuera di Cuerpo Policial.
Minister Oduber ta kere cu esaki simplemente ta un manera pa purba scapa cara despues di e berguenza cu partido MEP ta pasando na e momentonan aki cu nan exponentenan logrando un edificio di Parlamento destrui y maltrato di nos pilar economico.
Un otro punto cu ta wordo menciona den e declaracion di keho di Sra. Wever-Croes ta cu Minister Otmar Oduber lo a bisa ‘als jullie bloed willen, zullen jullie bloed krijgen’. Riba esaki e mandatario a bisa cu no tin ningun seriedad di parti di fraccion di MEP pasobra claramente por a mira ora cu cierto miembronan di e fraccion aki kier a hasta habri porta pa manifestantenan drenta, por a scucha tironan pafo y ta bin cu un declaracion asina.
Mientras tanto e minister ta bisa si cu tabatin hendenan responsabel den e fraccion di MEP manera ta Sr. Glembert Croes, cu kende el a conversa pa mira con por calma e situacion cu tabata andando na e momentonan ey, mientras cu otro exponentenan tabata drenta sali for di e edificio, para cu manifestantenan, purba habri porta pa manifestantenan, te cu cierto momento polis mester a blokea tur porta pa evita cu algo contra ley por a tuma lugar of cu tur hende lo por a lamenta despues.
E confrontacion a bay te na e punto cu tabata menaza di kier a tuma over e sala di Parlamento, algo cu por a wak cu tabata e caso mirando kendenan tabata e ‘frontliners’ dilanti porta, esnan cu a agredi polis cu ta hendenan hopi ayega na partido MEP. E hechonan aki ta algo cu a wordo condena pa comunidad, pa propio exponentenan di partido MEP.
Finalizando Minister Otmar Oduber a bisa cu nos mester realiza cu tin un Gobierno democratico, cu tin un Gobierno cu tin sosten di un mayoria amplio den comunidad y nos sistema democratico ta permiti cu cada 4 aña ta bay eleccion, sea ta premia e Gobierno dunande 4 aña mas di confianza of ta keure af bisando cu kier cambio y ta busca otro partido pa goberna.

Expresionnan haci den e articulo aki no necesariamente ta refleha opinion di ArenaPoliti.co