Contrario na deseo di partido MEP na 2007 

Minister Otmar Oduber enfaticamente a rechaza e declaracionnan haci dor di oposicion, specialmente partido MEP y esnan cerca di dje cu ta bisa cu Aruparking ta un compania priva, cu ta cay bou di algun persona individual.
Minister Oduber a bisa cu e declaracionnan aki no por ta mas leu di berdad, pasobra Aruparking N.V. ta cay bou di Arubus N.V. y tipo di declaracionnan asina ta mustra e malicia di opositornan.
Nan ta usando e registro di Camara di Comercio pa bisa cu Aruparking ta den mannan priva, pero contrario na e ponencianan aki, esey no ta e caso, por lo menos no awor cu e la wordo realiza.
Minister di Transporte a bisa cu contrario na loke ta tumando lugar na e momentonan aki, na 2007 intencion di Gobierno di MEP tabata pa bin cu parkeermeters y pa esakinan ta den mannan priva y esaki a wordo firma e tempo aya Sr. Nel Oduber a firma den Conseho di Minister.
Loke ta tumando lugar na e momentonan aki, despues cu e ley a wordo aproba den Parlamento, ta cu Aruparking ta cay 100% bou di Arubus cu ta un compania 100% di pueblo di Aruba. Esnan cu a lanta e compania y tin cu para responsabel pe na Camara di Comercio ta e Hunta di Comisario di Arubus y esey ta e cuatro nombernan cu ta aparece riba e registro di Camara di Comercio cu oposicion y esnan cerca di dje ta utilizando.
“No tin nada di berdad den loke nan ta bisa, nan ta purba tira santo den wowo di pueblo como si fuera cu esaki ta un medida. Al contrario, esaki ta un entrada pa Arubus pa por haci posibel cu por continua cu e subsidio na nos pensionadonan”, Minister Otmar Oduber a indica.
El a agrega cu den Reino Hulandes y na hopi parti di mundo, Aruba ta e unico cu ta permiti transporte gratis pa personanan mayor di 60 aña (esaki lo cambia pa 65 aña gradualmente mirando e cambio di ley) y esaki lo wordo manteni. Tambe lo mantene tarifanan preferencial pa loke ta trata hobennan di scol y esun di deporte tambe(lo pasa di 1.50 pa 2.00), mientras cu e tarifa normal ta Afl. 3.00
Cu esaki e mantario kier splica cu e placa cu ta wordo genera dor di Aruparking, 100% di dje ta keda pa Arubus y esaki lo haci posibel cu transporte publico por sigui ta gratuito pa nos grandinan y por mantene tarifanan preferencial pa nos hobennan y deporte, teniendo na cuenta cu na e momentonan aki cada trip ta costa Arubus Afl. 5.60.
Minister Otmar Oduber ta lamenta cu exponentenan di partido MEP y esnan cerca di nan ta distribui un informacion cu no ta berdad, cu no tin logica su tras y cu simplemente cu metanan politico ta purba confundi nos comunidad.

Expresionnan haci den e articulo aki no necesariamente ta refleha opinion di ArenaPoliti.co