Resultado di 6 aña di mal maneho financiero 

No tin palabra pa describi e actitud di e parlamentario y ministronan di AVP, kendenan despues di a traiciona nos Status Aparte riba 27 di augustus ultimo ta sigui manipula mente di pueblo bisando cu e ley di CAFT no ta contene ningun medida. Hecho ta cu pueblo no mester lubida cu ya durante 6 aña largo caba e gobierno di AVP a bin ta suta pueblo cu medida tras di medida y awor – mediante di e ley di CAFT - nan lo sigui corta den e gastonan explosivo cu nan mes a crea y cual lo afecta tur ciudadano den e pais aki. Den total nan lo corta na 2015: 281.4 miyon, na 2016: 349.7 miyon, na 2017:412.9 miyon y na 2018:465.1 miyon florin. Den e articulo aki MEP lo elabora riba 4 di e 24 medidanan cruel cu AVP a vota na fabor siman pasa y cual tin como consecuencia, strangulacon di henter e pueblo Arubano. Den e tabel adhunto por mira cuanto lo corta tur aña durante 2015-2018.

Reduci mitar di e cantidad di contractantnan: Gabinete Mike Eman ta e gobierno cu desde Status Aparte a kibra tur record den emplea contractantnan/pensionadonan den servicio di gobierno. Pa gran parti e grupo di personanan aki ta fungi como coordinadornan di e 9 ministernan, pero hopi di nan no tin ningun clase di preparacion. Un otro grupo di contractantnan ta traha na e diferente departamentonan gubernamental cu mester di e empleadonan aki, ya cu nan tin tareanan concreto pa haci. Reduccion di e cantidad di contractantnan te na mitar (medida) mester implica si, cu lo cuminsa prome cerca e coordinadornan di e ministernan cu ta costa pueblo un suma total di 46 miyon florin tur aña, sin cu e personanan aki ta produci algo positivo pa comunidad.

Reforma e areglo di pensioen di APFA: Segun Gabinete Eman e reforma di areglo di pensioen di APFA lo mester produci 30 miyon florin netto. Esaki ta nifica cu 53.8 miyon florin ta wordo gespaar tur aña y esaki como consecuencia di un prima di pensioen mas abao (medida). Aki nos por mira con e contribuyentenan den e fondo di APFA un biaha mas ta ser sacrifica, despues cu nan mester a sufri caba pa loke ta e aumento di edad di pensioen te 65 aña, e franchise, middelloonregeling y tambe reduccion drastico di e duurtetoeslag.

Reduci gastonan di huur y lease di autonan: Den e ultimo 6 añanan e sumanan na huur di edificionan priva pa ubica departamentonan di gobierno y tambe e leasemento di autonan a aumenta drasticamente. Sinembargo, no ta e gobierno di AVP aki mes semper tabata demoniza MEP pa loke ta e huurmento di e edificionnan priva? Hecho ta cu durante Gabinete Oduber a ser construi tres edificio pa ubica Finanzas, Belasting, DOW, Kadaster y ATA y asina gradualmente reduci e placa di huur di edificionan priva. Pregunta ta, cuanto edificio e gobierno di AVP a construi durante 6 aña?

Introduccion di Financial Transfer Tax: Entrante 2016 Gabinete Mike Eman lo introduci un Financial Transfer Tax, esta un medida cruel caminda pa tur transferencia bancario lo bay cobra un porcentahe y cual suma lo bay directamente den caha di gobierno. E fondo crea aki ta pa paga principalmente tur e proyectonan PPP (Hospital, Green Corridor, Ringweg, 5 Facilidad Multifuncional –MFA). Den total pueblo mester bay paga mas cu 2 biyon florin den e proximo 25 pa 30 aña. Sinembargo tur instancia local y internacional, manera Banco Central, Asosacion di Banconan, Camara di Comercio, ATIA, CFT y IMF ta contra introduccion di e belasting nobo aki, ya cu esaki lo afecta nos economia seriamente. Alavez ta un hecho cu pueblo mes no por sigui carga tur e peso financiero aki mas.  Cu e medida cruel aki durante 2016-2018 Gabinete Eman lo bay ranca den total 209.3 miyon florin for di cartera di e pueblo Aruba. Si e Financial Transfer tax aki no ta un medida, ta con nos tin cu yama esaki anto?
Den un siguiente articulo partido MEP lo elabora riba tur e otro medidanan cu ta na caminda y p’asina haci nos pueblo consciente kico ta spera nan na man di e gobierno burdugo aki.

Expresionnan haci den e articulo aki no necesariamente ta refleha opinion di ArenaPoliti.co