“Enseñansa ta keda hunga un rol  importante den restructuracion economico di nos pais” 

ORANJESTAD - Aña Parlamentario 2015-2016 a habri cu su tradicional ceremonianan y discurso di Gobernador di Aruba Fredis Refunjol, kende a repasa varios tema di importancia, entre nan enseñansa. “Enseñansa ta keda hunga un rol importante den e fase di restructuracion economico di nos pais. E meta final di nos inversionnan financiero, fisico y humano den enseñansa, mester ta pa finalmente mehora e calidad di bida di nos ciudadanonan. P'esey ta sigui innova nos enseñansa, promove activamente ciencia y investigacion, como tambe aumenta uzo di informatica y telecomunicacion den nos klasnan. Retencion di e alumno y e studiante te na su graduacion ta un meta riba su mes den e proceso di renobacion di enseñansa. Mas y mas hoben cu un nivel di conocemento amplio y profundo, ta nifica un empuhe significante pa cada un di nan y pa henter sociedad.”

Den palabranan bon scogi Gobernador a splica cu un economia basa riba conocemento ta fundamental pa un prosperidad comparti y sostenibel. Mes importante ta e formacion di un sociedad unda e miembronan ta convivi y comparti cu otro. El a menciona cu Gobierno di Aruba lo sigui cu ehecucion di e maneho dirigi na revitalisa y fortifica barionan door di brinda e habitantenan e facilidadnan necesario. E centronan multifuncional pa servicio publico den diferente districto, lo duna un aporte importante den esaki. Mas actividad den bario lo contribui na e maneho integral pa hubentud. Refunjol a indica cu maneho di gobierno ta enfoca pa sigui duna training na esnan cu ta eherce trabou boluntario y lo establece un red di boluntario specialisa. “Lo ehecuta e siguiente fasenan di e proyecto ‘Nos Atardi’, cu lo brinda actividadnan y guia pa hobennan despues di scol. Lo continua cu e trayecto di formacion social y evalua e posibilidad di introduci un trayecto igual pa hende muhe. Como parti di e encargo di formacion cu formado a ricibi, lo cuminsa cu preparacion di e despacho di e ombudsman.“

“E di tres componente pa por crea prosperidad comparti y sostenibel, ta creacion di un sociedad mas saludabel y ecologicamente responsabel. Cu programanan di conscientisacion y un infrastructura mas adecua, nos por bisa cu nos pais a cuminsa move! Nos por constata un aumento den e cantidad di ciudadano di tur edad cu ta practica deporte of ta haci ehercicio riba un base regular. Esaki ta un logro significante den cuido di salud di nos comunidad. Cu tempo, esaki lo traduci su mes den reduccion di enfermedad y lo contribui na un isla mas saludabel.” Cu orguyo Gobernador a laga logronan di e deportistanan di Aruba resalta den su discurso. “E exito di nos hoben deportistanan den competencianan internacional, ta muestra di e entusiasmo di hobennan pa practica deporte y di e dedicacion continuo di centenares di boluntario den educacion y formacion civico di nos hobennan pa medio di deporte.”

Expresionnan haci den e articulo aki no necesariamente ta refleha opinion di ArenaPoliti.co