Economia di conocemento tambe a haya atencion

ORANJESTAD - Gobernador Fredis Refunjol den su discurso na inicio di aña parlamentario 2015-2016, a haci mencion di inversionnan grandi cu ta tumando luga na Aruba. Asina el a menciona cu e aña aki por mira inicio di Green Corridor. Un proyecto pa mehora mobilisacion riba Aruba den forma considerabel. Mescos tambe ta haci entrega di e waf nobo na Barcadera e aña aki. El a splica cu e beneficionan social y economico di ambos proyecto ta grandi. “Nos lo mira un impulso pa e comerciante mediano y chikito, como tambe creacion di aliansanan strategico cu lo eleva nos isla na un nivel mas halto di desaroyo.” Palabranan elocuente cu ta duna un bunita bista di e futuro di Aruba.

Gobernador Refunjol a bisa cu mientras paisnan grandi y chikito ta recuperando poco poco di e crisis cu na 2008-2009 a yega su climax, nan deseo y necesidad ta pa renoba nan infrastructura economico, fiscal, fisico y social, como tambe pa recobra e oportunidadnan cu no por a probecha di nan durante e periodo ey. “Aruba a tuma pasonan importante cu inversionnan grandi durante y despues di e crisis, cu ta y lo bira mas crucial ainda pa nos pais sigui resalta den un area di mundo cu ta cambia y bira mas competitivo continuamente.”

Economia di conocemento ta central den e programanan di gobierno y den su discurso Gobernador a menciona esaki. “E desaroyo economico di nos isla no solamente ta enfoca riba tecnologianan limpi, pero tambe riba un economia di conocemento. Esaki ta forma e cuadro di e maneho economico nos dilanti cu tin efecto directo riba creacion di cuponan di trabou pa nos ciudadanonan, nos reservanan di divisa externo y nos finanzas publico.”

Turismo ta sigui crece na Aruba. Cifranan increibel di su crecemento ta muestra di esaki. “Den turismo nos a surpasa e cifra di 1 miyon di bishitante aña pasa; e aña aki nos lo yama bon bini na mas turista ainda y e entradanan pa cada camber disponibel lo sigui subi. Na mes momento, nos ta sigui busca actividadnan nobo pa nos pais y ta sigui revisa oportunidadnan cu historicamente a sostene nos economia. Un factor importante ta e hecho cu Aruba tin e capacidad pa transforma su mes den un centro di conocemento den cua gobierno, comercio y enseñansa ta uni forsa y comparti conocemento pa asina eleva nos nivel di desaroyo. Cu e meta di stimula ciencia y innovacion den e oportunidadnan economico nos dilanti lo tin atencion special pa e asina yama startups. Den cooperacion estrecho cu sector priva, gobierno ta trahando pa aumenta participacion di mas ciudadano den nos mercado laboral.”

Expresionnan haci den e articulo aki no necesariamente ta refleha opinion di ArenaPoliti.co