Casi na final di su discurso sumamente eloquente na apertura di aña parlamentario 2015-2016, Gobernador di Aruba sr. Fredis Refunjol, a pone atencion na e instigacion politico, e violencia y destruccion cu a tuma luga siman pasa na Aruba. Den palabranan cu no ta laga duda pa niun hende, sr. Gobernador a desaproba categoricamente e violencia y destruccion como un forma di politca acceptabel na Aruba. Sr. Gobernador a bisa literalmente cu hamas loke a sosode tin mag di ripiti su mes den nos pais. Sr. Gobernador a bisa esaki:"Mi ta  expresa e deseo ferviente na tur miembro di Parlamento y na tur como lidernan politico di nos pais, cu nan lo guia nan siguidornan, pa e sucesonan recien di division, agresion, violencia y destruccion di propiedad publico, hamas bolbe ripiti. Ban usa nos energia pa democraticamente convivi y comparti mas cu otro". Cu e palabranan ey sr. Gobernador a bisa na su forma elegante y cu ta cuadra cu su funcion di hefe di gobierno, cu instigacion, violencia, agresion y destruccion no ta acceptabel den un democrasia y cu nan no ta contribui na nada positivo pa nos pais.



DEMOCRASIA
Awor ta keda na e partido MEP pa bandona definitivamente e caminda di instigacion, agresion, intimidacion, destrucion, sushamento di nomber di hende, di crea division den pueblo y acusacion falso di hende den nan medionan di prensa y den forma scondi riba Facebook. Nan tin cu bolbe na e caminda cu democrasia ta prescribi. Esta e caminda di dialogo y debate, e intercambio publico di idea y proposicionnan riba con pa haci nos pais uno mihor pa nos tur. E realidad ta cu pa hopi aña caba oposicion a rechasa dialogo como un forma legitimo di yega na desicionnan pa nos pais. E lider di MEP a yama e dialogo social un "washi washi" y e lider di PDR a bisa cu e dialogo social ta mina e autoridad di Parlamento. Ta tempo awor pa nan brasa dialogo y debate publico como e forma corecto pa hiba politica. Nan mester usa e instrumentonan aki pa convence Pueblo cu nan tin e miho plan y programanan pa nos pais. E realidad ta cu den e ultimo 6 aña partidonan di oposicion a presenta casi nada na idea, sugerencia, plan of programa pa mustra pueblo cu nan por goberna nos pais miho. Aki aya un mocion of amienda of bisa cu bo tin un proposicion di ley pero nunca bo ta entregu'e, no ta muestra di e capacidad pa goberna nos pais. Lider di fraccion di AVP sr. Rene Herde' a duna e siguiente comentario riba e tema aki:"Ora bo critica, bagatelisa y rechasa un plan cu un otro presenta bo no ta cla. Bo mester presenta un miho plan cu ta mes of mas realistico y realisabel. Para na banda, grita, acusa, te hasta gaña y tira piedra, ya no ta un opcion politico pa niun partido. Awor no. Den futuro tampoco. Specialmente sector publico y hobennan kier tende argumento y wak plannan concreto. Si bo no por haci esey, Bo no por sigui cu e construccion di nos pais. E ora en berdad bo ta recuri na agresion y destruccion."

Expresionnan haci den e articulo aki no necesariamente ta refleha opinion di ArenaPoliti.co