Den henter historia di sindicalismo na mundo y na Aruba, e meta di DIALOGO semper tabata central. Sindicatonan semper tabata kier tin e posibilidad pa negocia acuerdonan pa nan trahadornan. Pasobra sindicatonan tabata conciente cu ta na mesa trahadornan semper a logra mas y henter comunidad a avansa mas, contrario na situacionnan di confrontacion. E welga di 7 siman di trahadornan di gobierno y maestronan di scol a duna e resultado di 105 florin pa trahadornan despues di 7 aña di negligencia. Den DIALOGO e sindicatonan a logra un adelanto di 5000 florin pa trahadornan. Esaki ta e miho ehempel cu tin pa splica e balor grandi di DIALOGO. Accion, interupcion di trabou y welga ta instrumentonan cu semper a usa como ultimo medio y pa forsa DIALOGO. Anto ta usa e instrumentonan di accion y interupcion di trabou, ora e otro partidonan no ta duna niun oido na necesidadnan di trahadornan of cu ta impone nan boluntad unilateralmente riba trahadornan. Pero esey ya no ta e caso na Aruba. Despues di 2010, DIALOGO a bira e forma responsabel y racional di traha na Aruba. Ta den DIALOGO a logra e adelantonan pa tur trahado na Aruba, cu no a conoce prome.

RESULTADO DI DIALOGO
E prueba cu a logra mas pa trahadornan y pa henter Aruba den dialogo entre gobierno, sindicato y doño di trabao, ta loke a logra desde 2010. Den dialogo social a atende cu temanan di economia, forsa di compra, pensioen, seguro medico, belasting, inversionnan den economia, bahamento di prijs di awa y coriente, seguridad y enseñansa. Den e periodo aki e salario anual di trahadornan di gobierno y maestronan di scol a bay dilanti cu 5000 florin, nan a haya indexering cu a wordo para pa ocho aña y nan pensioen a wordo poni bek na cobertura di 100%. Pa trahadornan den sector priva a introduci e reparatietoeslag pa tur e trahadornan cu salario te 2400 florin y a introduci e seguro di pensioen general pa tur trahado den sector priva. Den futuro nan tambe lo tin dos fuente di pensioen: e pensioen di behez y e pensioen cu nan mes y nan compania ta crea. Tur esaki via dialogo cu respet pa tur gremio. Si bo wak djis esaki, sin conta e tension y intrankilidad cu conflicto y confrontacion ta trece, tin tur motibo na Aruba sigui cu dialogo pa hunto bay dilanti! Rene Herde: "Awor cu nos a logra e meta sindical di DIALOGO, nos no por bay bek atras."

Expresionnan haci den e articulo aki no necesariamente ta refleha opinion di ArenaPoliti.co