ORANJESTAD- Aruba a wordo premia door di Global Future Travel Experience pa e proyecto revolucionario ‘Aruba Happy Flow’, cu na mei 2015 a bay den funcion. Happy Flow, un proyecto conhunto entre  gobiernonan di Aruba y Hulanda, Schiphol Group, KLM, Aruba Airport Authority y e contratista principal Vision Box, ta usa tecnologia di reconocimento di cara como e base pa e unico muestra di e pasahero kitando di e forma aki e necesidad pa e pasahero mester mustra su pasaporte y boarding pass na e diferente lugarnan cu e ta pasa prome drenta y baha avion. E meta a largo plazo di Happy Flow ta pa crea un programa mas amplio di preclearance Europeo y drecha e caminda pa un transformacion di e manera con pasaheronan ta wordo procesa den aeropuertonan rond mundo.

Proyecto ta drentando su siguiente fase

Durante e conferencia anual di ‘Global Future Travel Experience’ na Las Vegas e proyecto ‘Happy Flow’ di Aruba a wordo premia cu e ‘Best Immigration and Arrivals initiative award 2015’. E reconocimento pa e proyecto unico aki di Aruba na Reina Beatrix Airport ta importante pa e proyecto mes y ta dun’e atencion mundial dentro di e industria di aviacion. Aunke cu e proyecto ta hopi mas cu solamente inmigracion y yegadanan di pasahero, e premio ta reconoce tambe cu e sistema di Happy Flow ta un bon iniciativa pa loke ta proteccion di frontera. E premio di Global Future Travel Experience award semper ta tene cuenta cu experiencia di e pasaheronan y con den un forma atento pa e cliente mehora e proceso na aeropuerto. 
Proyecto Happy Flow di Aruba ta drentando su siguiente fase. E proyecto cu ta dura dos aña, ya tres luna pasa a cera su prome fase exitosamente. Durante e sprint inovativo aki a resulta cu e sistema di Happy Flow ta uno hopi stabil. Ampliacionnan cu no tabata planea ainda, a wordo ehecuta sin problema. Asina awor, banda di esnan cu tin pasaporte Europeo, Mericano y Canades, esnan cu tin pasaporte Chileno, Argentino y Brazileño tambe por haci uzo di e sistema.  Tambe a cambia e edad di usuarionan na 8 aña. Di e forma aki Aruba ta un di e prome paisnan rond mundo cu ta laga muchanan di e edad ey haci uzo di e transito di frontera automatico. E cambionan aki a aporta  na e cantidad cresciente di usuarionan, principalmente di pasaheronan cu ta yega. Tramitacion di pasaheronan cu ta yega y en particular durante oranan pico manera den fin di siman, tin hopi bentaha dor di e portanan automatico di transito di frontera.

Expectativa ta cu pronto pasaheronan cu ta sali di Aruba fuera di e oranan di ‘Happy Flow’ y vuelonan di KLM, por haci uzo di e portanan automatico di transito di frontera. Dia 1 di september e di dos parti di inovacion a start. E sistema Happy Flow ta wordo amplia cu un work flow cu un nivel di composicion pa tur stakeholder envolvi na aeropuerto. E nivel di composicion aki lo percura pa e procesonan di trabou entre aeropuerto, airline y inmigracion ta den miho concordancia cu otro. Asina por ehempel un pasahero cu ta laat pa su buelo ta wordo señala mas lihe y su maleta por wordo saca di e avion, evitando asina retraso di e avion.  Tambe e aeropuerto ta haya un miho bista con evita rijnan largo di espera y retraso. Aruba Happy Flow ta e prome proyecto na mundo cu e pasahero y henter e proceso riba un aeropuerto di airline, inmigracion y aeropuerto ta conecta cu otro pa medio di biometria. Aruba, pabien cu e premio prestigioso y bon mereci aki. Pabien na e team cu a traha duro riba e proyecto Aruba Happy Flow. Trabou ta sigui.

Expresionnan haci den e articulo aki no necesariamente ta refleha opinion di ArenaPoliti.co