Parlamentario Rene Herdé (AVP): E contesta riba agrecion y violencia mester ta masha cla y mester duna perspectiva
![Herde08](/images/779x490/Herde08.jpg)
E agresion y violencia cu partido MEP a instiga, a causa hopi daño. E daño fisico na edificio di Parlamento por ta casi ful kita for di bista. (E boluntarionan a haci un bon trabou!) Pero e daño permanente cu nan a causa ta den mente di hende y den e imagen di Aruba. Apenas dos siman pasa e inhabilidad politico di oposicion a hiba nan na instiga hende pa agredi hende y comete destruccion. Den nos pais, mescos cu hopi otro pais a yega di tin diferencianan di opinion fuerte riba tur sorto di tema. Pero apesar di tur e protesta y marchanan cu partidonan a tene, hamas a instiga pa destrui nos pais manera MEP a haci. Dos siman pasa e lidernan di MEP a instiga y a aplaudi agresion contra ciudadanonan di nos propio pais y contra polis cu tey pa cuida nos tur. E lidernan di MEP a bisa “ESAKI TA GUERA”. E unico splicacion cu tin pa e instigacion di lidernan di MEP pa e agresion y violencia aki, ta nan inhabilidad pa duna sikiera un indicacion di con nan lo kier pa gobernacion di nos pais ta. Sikiera un idea, un proposicion contrario y miho cu loke AVP ta haci. Sikiera un plan pa con lo por a saca nos pais di e crisis economico, financiero y social cu MEP a hinca y laga nos pais aden apenas 6 aña pasa. E inhabilidad aki di MEP ta hiba e lidernan na bisa y haci cosnan inresponsabel. Awor pa colmo nan kier nenga despues. Inhabilidad y insinceridad!
CLARIDAD
E miho forma pa para y desenmascara e motibonan pa cua MEP ta instiga hende contra otro aki na Aruba, ta pa mustra riba e forma cu MEP ta gaña hende y con MEP ta purba crea speransa falso. E otro forma ta pa mustra kico si ta y mester haci pa desaroya nos pais y habri oportunidad pa un miho bida pa tur! Ehempelnan di e inhabilidad di lidernan di MEP tin na cantidad. Dos siman pasa AVP a mustra con MEP a instiga hende, incluso sindicalistanan, cu e mentira cu den e ley lo tin medida contra Pueblo. Ora nan a wordo desenmascara, nan a core bisa cu ta den otro documento cu nan tin mas cu un aña caba, tin medida scirbi. Siman pasa a tende e lider di MEP instiga hende contra di e sistema di para auto den centro di ciudad, bisando cu ta un grupo di ciudadanonan a lanta un compania pa bay cu tur e placa cu hende ta paga pa para nan auto. Tin hasta comerciante cu a kere nan. E berdad ta cu ta e gerencia di Arubus mes como un compania nacional, a lanta e compania “AruParking” como un sub-compania di Arubus cu ta encarga solamente cu e sistema di para auto den centro. Tur e placa di e paramento di auto ta bay pa Arubus. Cu e placa aki Arubus por sigui tene e trahadornan na trabou, sigui tene e prijs di bus abou pa pensionadonan sin auto y pa por transporta muchanan di scol na un prijs special. Esaki e lidernan di MEP NO ta bisa niun hende. Esaki ta preuba cu placa di Pueblo ta sigui bay pa Pueblo bou gobierno di AVP, contrario na gobernacionnan di MEP. E claridad aki ta habri wowo di hopi hende. Hende cu sin pensa mas leu a kere e mentiranan di MEP.
Expresionnan haci den e articulo aki no necesariamente ta refleha opinion di ArenaPoliti.co