Nos a tuma nota di e articulo di prensa di parlamentario Baba Herde na unda e ta tilda e parlamentarionan di Fraccion di MEP di ta asina ausente te cu nos no ta realisa cu e rapport di CFT ya a wordo trata pa Parlamento. Ta bisto cu aki Baba ta bolbe purba bruha tera y sconde e berdad. Parlamento di Aruba ningun dia a debati riba e KB y e rapport di CFT den un reunion publico pa asina Pueblo di Aruba por haya sa kiko e rapport di CFT ta contene y kiko su consecuencia lo ta pa e Pueblo di Aruba.

E modus operandi di e Fraccion di AVP ta pa evita pa Pueblo haya sa e cosnan robes cu Gabinete Eman ta haci. Pa e motibo aki enves di debati riba e temanan importante pa nos Pais den un reunion publico, nan ta scohe pa trata esakinan porta sera den reunionnan di comicion di Parlamento. Esaki ta netamente locual nan a haci cu e corespondencia entre Aruba y Hulanda na comienso di 2014 relaciona cu e Presupuesto 2014 cu a hiba te cu nos Pais a haya un KB y un investagacion di CFT. E ex Minister Yrausquin a core mustra su carta di ‘geen bezwaar’ den e comicion financiero pa despues den su afan pa tene e informacion aki scondi pa Pueblo, nenga di presenta e carta aki durante e debate publico. Pero despues di basta insistencia di opocicion e mandatario a haye ta presenta tur documentacion y Pueblo por a mira cu su mesun wowo kiko tur a wordo trama tras di lomba di Pueblo.

Awor cu e KB y e rapport di CFT ta mesun modus operandi nan ta aplica. Core yama Minister Bermudez den e comicion financiero y tras di porta sera laga e mandatario lesa e carta cu Gabinete Eman a manda Hulanda den cual cu ta bisa cu CFT no a bisa Aruba nada cu nos no tabata sa. Anto esaki Baba Herde ta considera cu Parlamento a trata e rapport di CFT? Asina aki segun Baba, Pueblo ta debidamente informa riba e contenido y consecuencia di e rapport di CFT? E contesta ta obvio, esaki ta bruhamento di tera, scondemento di e berdad y tumamento di Pueblo haci, djies pa no presenta e realidad amargo di e situacion pesimo di e finanzas publico di nos Pais.

Pesey ta di spera cu Baba y Fraccion di AVP realisa cu nan no por keda bruha tera pa purba sconde e berdad. E ora a yega pa asumi nan responsabilidad y brinda Pueblo den un reunion publico e claridad necesario riba e contenido y e consecuencia di e KB y e rapport di CFT pa e Pueblo di Aruba.

11 november 2014

Expresionnan haci den e articulo aki no necesariamente ta refleha opinion di ArenaPoliti.co